Akkordertarneq pillugu pikkorissarnissaq ilaasortanut tamanut ammavoq. Pikkorissarnernut peqataaniarluni nalunaarneq qarasaasiakkuulerpoq. Pikkorissarnissaq ataaseq taamaatiinnarneqarpoq.
Akkordertarneq pillugu pikkorissarnissaq ilaasortanut tamanut ammavoq
Erseqqissarusupparput pikkorissarnissanut pilersaarutini tuliuttoq, sanaartornermi sulisut akkordertarnerat pillugu pikkorissarnissaq, SIK-mut ilaasortanut sanaartornermi sulisunut tamanut ammammat – sulisut sinniisaannuinnaanngitsoq.
Pikkorissarnissaq taanna pissaaq sap. ak. 38-mi, tassa ulluni 15.-19. septembari 2025, Ilulissani Hotel Arctic-imi. Malugineqassaarlu peqataaniarluni nalunaarnissaq aggustip 15-ianut killeqarmat.
Taamatut pikkorissaanissami siunertaavoq sanaartornermi sulisuusut akkordernermik aaqqissuussinerup qanoq ittuuneranik aammalu akkorderluni sulinerup qanoq naatsorsorneqartarneranik paasisaqarnerunissaat. Aammattaaq sullivinni avatangiisit sammineqassapput sanaartornermi tamakku aamma pingaaruteqartaqimmata.
2024-mi pikkorissarneq taamaattoq Nuummi ingerlanneqarpoq peqataasunut pissarsilluarfiusumik. Taamaattumik ukioq manna tamanna neqeroorutigineqaqqippoq.
Peqataaniarluni nalunaarneq qarasaasiakkuulerpoq
Soorlu ilaannit malugineqareersimassagunartoq, pikkorissarnermut peqataaniarluni nalunaarneq immersugassakkut pappialakkut pisarunnaarpoq. Maannamit peqataaniarluni nalunaarneq SIK-p nittartagaatigut toqqaannartumik immersuinikkut pisinnaanngorpoq – ateq, najugaq paasissutissallu allat tassani pisarnertut allattorneqassallutik.
Immersugassaq nutaaq takuniarlugu una tooruk
Immersugaq nassiutereersimagaanni e-mailadressimut allassimasamut uppernarsaammik automatiskimik nassiussisoqartarpoq. Taavalu kingusinnerusukkut pikkorissaasoqarfimmit nalunaaruteqartoqassaaq peqataasussanngorneq il.il. ilisimatitsissutigineqarlutik.
Nittartakkami immersugassap nutaap imarisamigut immersugassatoqaq pappiala assigiinnangajappaa. Allaanerussuteqarporli:
Immersugassatoqqami sulisitsisoq atsiorfissaqarpoq suliffiup akuersisimaneranut uppernarsaataasumik. Nittartakkakkut immersugassami nutaami taamaallaat toortagaqarpoq allassimasumik ”Suliffimma akueraanga pikkorissarnermut peqataasinnaasunga”. Tassalu sulisitsisoq oqaloqatigeqqaagassaavoq – soorlumi aamma siornatigut taamaattuarsimasoq.
Pikkorissarnissaq ataaseq taamaatiinnarneqarpoq
Ukiup sinnerani pikkorissarnissanut pilersaarummi ataaseq taamaatiinnarneqarpoq. Tamatumani pineqarpoq assigiimmik sulialinnut pikkorissarneq GE-p isumaqatigiissuteqarfiini sulisut sinniisaannut saamisitaq novembarimi sap. ak. 47-mi pisussaagaluartoq. Taamaatitsiinnarneq SIK-p allattoqarfiani suliassanik pingaarnersiueqqittariaqalernermik pissuteqarpoq.
Taamaalilluni 2025-p sinneranut pilersaarutini pikkorissarnissat sinneruttut marluupput:
Sap. ak. 38-mi ulluni 15.-19. septembari Ilulissani Hotel Arctic-imi sanaartornermi akkordertarneq pillugu pikkorissarneq, aamma sap. ak. 41-mi ulluni 6.-10 oktobari, aamma sumiiffimmi tassani, sulisut sinniisaasa tunngaviusumik pikkorissarnerat.