Sisimiuni sulisartut peqatigiiffiata SPS-ip nutaamik siulittaasussarsineratigut piffissaq immikkut malugisarialik naasussanngorpoq nutaarlu aallartittussanngorluni. 1. januaari 2024-mit Jens Johansen siulittaasuujunnaarlunilu peqatigiiffimmi siulersuisooqataajunnaassaaq ukiut 40-t sinnerlugit tassani aqutsisooqataareerluni.
Jens Johansenimi aalajangereersimavoq qinigassanngorteqqinniarnani. Novembarimi peqatigiiffik ataatsimeersuarmat maannamut siulittaasup tullerisaa Helene Sofie Olsen ukiortaamit siulittaasunngortussatut qinigaavoq.Sisimiuni siulersuisunut qinigaasut allat tassaapput siulittaasup tullia Kristian Barselajsen, allatsi Malene Themotheussen siulersuisunullu ilaasortat Tobias Rasmussen, Birgithe Andreassen, Magdaline Markussen aamma Pauline Andreassen.
Jens Johansen 1980-ikkunnili Sisimiuni sulisartut peqatigiiffianni aqutsisooqataareerluni tunuarpoq.
Helene Sofie Olsen ukiortaamiit Sisimiuni sulisartut peqatigiiffianni siulittaasuulissaaq.
Sisimiuni SPS-imi siulersuisussatut qinnigaasut: Helene Sofie Olsen, Kristian Barselajsen, Malene Themotheussen, Tobias Rasmussen, Birgithe Andreassen, Magdaline Markussen aamma Pauline Andreassen.