Ilisimatusartoq Per Langgaard oqariartorpoq tuluit oqaasiisa oqaatsit allat ingiassagaat, isumaqarlunilu pitsaanerussasoq qallunaat oqaasii uagut kalaallit atorutsigit, tassa kalaallisut oqaatsivut tuluit oqasiisa ingiannginnerussammatigit.
Ok, ajunngilaq taanna aallaavigisigu. Maannakkut tusaasinnaara naapertorlugu minnerunngitsumik Nuummi qallunaat oqaasiisa kalaallisut oqaatsivut ingialerpaat. Tassami ulluinnarni meerartavut annertoorujussuarmik qallunaat oqaasiinik atuilerput, mianersunngikkuttalu Nuummi ukiut 30-t qaangiuppata qallunaat oqaasiisa oqaatsivut ingiarsimassavaat.
Ullumikkummi allaat aanaakkut aataakkut ulluinnarni ilaatigut ima oqalulersimapput: ”Ullumikkut kyllingitussaagut sovsilerlugu risilerlugulu.” Taava sorlermitaava pitsaanerua: Qallunaat oqaasiisa kalaallisut oqaatsitsinnik ingiarpatigut imaluunniit tuluit oqaasiisa oqaatsivut ingiarpatigit?
Taava pitsaanerutippara tuluit oqaasiisa oqaatsivut ingiarpatigit, taakkumi nunarsuarmi sumi tamani atorsinnaavavut, illuatungaatigut qallunaat oqaasii taamaallaat Danmarkimi atorneqartut allamilu nunarsuarmi atorneqaratik.
Sisimiut, 22. januaari 2019
Jess G. Berthelsen
Kattuffiup siulittaasua