Skip to content

Sulisartut nunani tamalaani ulluat

Matuma allanneqarnerata nalaani paasivarput maajip aallaqqaataasiornissamik illoqarfinni pingasuni pilersaaruteqartoqartoq: Qaqortumi, Nuummi Ilulissanilu.

Ilulissani kulturikkut illorsuarmi Sermermiuni nal. 13.00-imit 15.00-imut katerisimaartoqassaaq. Sulisartut peqatigiiffiata siulittaasua Else Jonna Lange maajip aallaqqaataasiummik oqalugiassaaq. Ôdâq Olsenip Aningaasaateqarfianit kajumissaasiisoqassaaq, oqaaseqarusuttullu periarfissinneqassapput. Akunniliisarumaarput nipilersortut Edvard Nielsen Aronsen aamma Sara Mina. Tamussiussassaqarumaarpoq najoqqagassaqassalluni kaageqarlunilu.

Nuummi nal. 12.15 Inatsisartut ataatsimiittarfiata saani erfalasoqarfimmi katersuutissapput. Tassanngaanniit ingerlaaqatigiinneqassaaq Katuaq saneqqullugu, illoqannginnersaq Amisut aqqusaarlugu, taavalu Tusass-ip /BankNordik-ip illorsuat saneqqullugu Katersortarfimmut. Katersortarfimmi nal. 15-ip tungaanut oqalugiaqattaartoqassaaq sulisut kattuffiinit politikkikkullu partiinit. Kaageqarlunilu, teeqarlunilu kaageqassaaq.

Qaqortumi Timersortarfiup eqqaani maajip aallaqqaataasiussapput nal. 13.00-imit 16.00-mut. Tamaani nunami iganeq (neqeq) kaffillernerlu ingerlanneqassapput. SIK-p Inuusuttaanit oqalugiartoqassaaq aammalu Qaqortumi sulisartut peqatigiiffianni siulersuisunut ilaasortaq Magdaline Ara Isaksen oqalugiassalluni. Tamakkua saniatigut meeqqanut inersimasunullu aliikkutaqartitsisoqassaaq soorlu allunaasamik noqqoruunnermik arsaannermillu.

Ilaneqariaannaavoq …

Siorna 2022-mi maajip aallaqqaataasiornermi assilisat ilaat.