Nikolaj Søholm, Aasiaat, aamma Grethe Fleischer, Uummannaq, 2023-mi sinniisutsialattut toqqagaapput.
Grethe Fleischer, Uummannaq, aamma Nikolaj Søholm, Aasiaat, ukioq manna sulisunut sinniisutsialattut toqqarneqarput.
SIK-mi siunnersorti Inge Marie Rosing ima nassuiaateqarpoq:
SIK-p kissaatigaa sulisut sinniisaattut sulinerup qanoq pingaaruteqartiginera pillugu ukkatarinnittuarnissaq, maannalu Siulersuisuunerit “Sulisunut sinniisutsialak” pingajussaaneerlutik aaliangiiffigisussanngorpaat.
SIK-p ukiumut sulisunut sinniisutsialannik pingasunik sisamanilluunniit ukiut tamaasa toqqaasarnissani eqqarsaatigaa, SIK-milu siulersuisuunerit innersuunneqarsimasut toqqartassavaat. Sulisut sinniisaat, ukiup sulisunut sinniisutsialaatut toqqarneqartut tamarmik diplominnatsinneqartassapput kiisalu aningaasartaqartinneqartassalluni 3.000 kr-nimik (akileraarut peereerlugu).
Siulersuisuunerit ukiup sulisunut sinniisutsialaanik toqqaallutik aaliangernissaminni makkua pingaartissavaat:
- Sulisut sinniisaattut sulilluartoq, sulisut sulisitsisullu akornanni suleqatigiilluarnissamik pingaartitsisoq,
- SIK-mi ilaasortaanerup iluaqutissartai pillugit suliniuteqarluartoq aammalu,
- Suliffimmi suleqatit isumaqatigiissutit tunngavigalugit pisinnaatitaaffiisa il. il. suliffeqarfimmi ataqqineqarnissaannik suliniuteqarluartartoq.
Innersuussinerit 9-it nassiunneqarsimapput
Innersuussinissamut killissarititaasup qaangiunnerani innersuussinerit 9-it tiguneqarsimapput. Innersuussinerit illoqarfinnit ukunanit nassiunneqarsimapput Aasiaat aamma Uummannaq.
Innersuussinernit 9-iaasunit SIK-p Siulersuisuunerisa ulloq 8. decembari 2023 ataatsimiinnerminni ukua “Sulisunut Sinniisutsialak 2023” toqqarpaat.
Grethe Fleischer, Uummannaq
Inunnit assigiinngitsunik pingasunit innersuunneqarsimavoq, tamarmillu immikkut oqaasertalersimallugu sooq Grethe Fleischer Sulisunut Sinniisutsialak 2023 toqqarneqassanersoq. Grethe Fleischer Najungaqatigiiffimmi suliffimmini sulisut sinniisaattut sulivoq.
Imatullu tunngavilersuuteqarput:
- SIK pillugu paasissutissanik siammarterisarpoq aammalu suut ilisimassallugit pingaaruteqartut anngunniartuartarpai.
- Sulinngittoorneq ajorpoq taamaalilluni suleqamminut maligassiuisuulluni.
Nikolaj Søholm, Aasiaat
Aqutsisuata suleqatigiillu peqatigiillutik Nikolaj Søholm Sulisunut Sinniisutsialak 2023 toqqarneqarnissaa pillugu inassuteqarsimapput. Nikolaj Søholm Gammeqarfimmi pedelitut suliffeqarpoq sulisullu sinniisaattut sulilluni.
- Inuppalaartoq, suleqatikkuminartoq maligassiuisoq
- Ukiorpassuarni sulisuusoq
- Nuannaartoq
- Tatiginartoq
- Sulisut sinniisoqatiminut suleqatikkuminartoq
- Ulapaarfimmi suliassanik naammagittarluni suliassanik naammassinniartartoq
- Malunnarpoq inuttut sulisutut sinniisutullu nukissaqarluartoq sulilu ineriartortoqt aammalu sinniisuuffimminut annertuumik tunniussaqarsimasoq. Aasiannilu sinniisutut ilaasortaaffigisani annertuumik kivitseqataaffigisimallugu
- Namminersullaqqissuvoq akisussaassuseqarluartuullunilu
Sulisunut Sinniisutsialak 2023-mut toqqarneqartut pilluaqquagut.