Allagarsiussassaq imaattoq sulisartut peqatigiiffiinut ullumi nassiunneqarpoq:
SIK-P ISUMAQATIGIISSUTAI MALILLUGIT SULISUUSUNUT TAMANUT:
Illit sulisutut sinniisut suliffeqarfinni akunnermiliuttutut ikiortissatullu atuuffeqarpoq sulisitsisumut sulisartullu kattuffiannut SIK-mut tunngatillugu.
Sulisut sinniisaata sapinngisamik pikkorissarluarsimanissaa pingaaruteqarpoq. Taamaattumik SIK ukiumut arlaleriarluni sulisut sinniisuinik pikkorissaasarpoq Immikkoortoq 1-inik aamma Immikkoortoq 2-nik.
Aamma pingaaruteqarpoq sulisut sinniisaata suleqatiminit tapersersugaalluarnissaa. Taamaattumik SIK-mut ilaasortaasutut sinniisunnut saaffiginneriaannaasariaqarputit isumaqaruit suliffinni iluarsisariaqartoqartoq.
Taamaattumik SULEQATAASUT isumasiornerisigut sulisartut kattuffiata SIK-p sulisut sinniisaasa sulinerat soqutiginarnerulersikkusuppaa.
Ukiuni kingullerpaani sineriassuatsinni tamarmi sulisartut periarfissittalerpavut sinniisutsialaatitaminnik toqqaanissaannut. Tamanna iluatsilluarmat ukioq manna tamatumunnga periarfisseeqqinniarpugut. Taamaattumik: Suliffinni kikkut ukioq manna SIK-p sulisut sinniisutsialaattut toqqassavai?
Maannakkut periarfissaqalerputit ”Sulisunut Sinniisutsialak 2022”-mut toqqarneqartussamik innersuussinissannut.
- Innersuussinissaq kingusinnerpaamik pissaaq ulloq 18. novembari 2022.
- Toqqaasoqassaaq ulloq 8. decembari 2022 SIK-p siulersuisuunerisa ataatsimiinneranni.
- Pingasut toqqarneqassapput. Toqqakkat diplomisitinneqassapput 3.000 kr.-inik aningaasartalinnik (akileraarutit ilanngaatigereerlugit).
Innersuussinerit uunga nassiutissavat: sik@sik.gl – uku nalunaarutigalugit:
- Kina toqqarneqartariaqartoq (atia kinguliaalu)
- Taanna sumi suliffeqartoq
- Sooq taannarpiaq ”Sulisunut Sinniisutsialattut” toqqarneqartariaqartoq