SIK-p siulersuisuuneri januaarip 21-ani ataatsimiinnerminni 2025-mi sulisut sinniisutsialaannik pingasunik toqqaapput, ukuusunik:
Helga Ottosen -sulisut sinniisaat Campus Kujalleq-mi, Qaqortumi. Sulisut sinniisuattut aallussilluartoq, pingaartillugulu suleqatit akornanni suleqatigiinneq aallunneqarnissaa aammalu sulisitsisut akuutillugit, aammattaaq pitsaasumik siammarterisarsimasoq SIK-mut ilaasortaagaanni iluaqutaasartut saqqummiulluartarsimagai.
Paninnguaq Bech-Poulsen -sulisut sinniisaat Royal Greenlandimi, Nuummi. Pikkorilluni aammalu sinniisuunini aallulluarsimagaa, kiisalu suleqatit pisinnaatitaaffiinik ilungersuuteqartartoq, aammalu suleqatit akornanni suleqatigiinnissap aallunneqarnissaa siuarsarsimallugu.
Mia Filemonsen -sulisut sinniisaat meeqqerivimmi ”Qupannaat”-ni, Kangaatsiami. Sulisut sinniisuattut aallussilluartoq, pingaartillugu suleqatit akornanni suleqatigiinneq pitsaasoq siuarsartuarsimagaa aammalu sulisitsisut akuutillugit pisarsimasoq, SIK-mut ilaasortaagaanni iluaqutaasartut saqqummiulluartarsimagai.
Paninnguaq Bech-Poulsen, Nuuk, NSIP-p siulittaasuata Peter B. Mølgaardip diplomimik tunigaa.
Mia Filemonsen, Kangaatsiaq
Helga Ottosen, Qaqortoq
”Sulisunut sinniisutsialannik” toqqaasarneq pillugu
Sulisut sinniisaasa pingaaruteqartunik atuuffeqarnerat malunnartinniarlugu SIK 2020-mi toqqaasitsisalerpoq ”Ukioq manna sulisunut sinniisutsialammik”. Taamanernillu ukiumut sulisut sinniisaasa ilaat 2-3 taama taallugit toqqarneqartalerput.
Taamalu 2025-mi ukiup naajartornerani SIK-ip allattoqarfiata peqatigiiffiit kaammattorsimavai siunnersuuteqaqqullugit.
Sulisut sinniisutsialaannik siunnersuuteqarnermi maluginiagassatut SIK-p siulersuisuunerisa makku pingaartikkumaaraat ilisimatitsissutigineqarpoq:
- Sulisut sinniisaattut sulilluartoq, sulisut sulisitsisullu akornanni suleqatigiilluarnissamik pingaartitsisoq,
- SIK-mi ilaasortaanerup iluaqutissartai pillugit suliniuteqarluartoq aammalu
- Suliffimmi suleqatit isumaqatigiissutit tunngavigalugit pisinnaatitaaffiisa il. il. suliffeqarfimmi ataqqineqarnissaannik suliniuteqarluartartoq.
Toqqarneqartut tamarmik immikkut diplominnatsinneqarput 3.000 kr.-inik aningaasartaqartinneqartumik (akileraarut peereerlugu).