Avannaata Kommuniata upissussinera isumaqatigaara. Akiligassat annertuallaarujussuarput aningaasarsianut sanilliullugit.
Avannaata Kommuniani borgmesterip Lars Erik Gabrielsenip SIK aammalu Naalakkersuisut assuarai, oqarluni SIK-p Naalakkersuisut kiisalu Kommunit isumaqatigiissutaat naapertorlugit aningaasarsiat annikippallaarnerarlugit.
Siullermik oqaatigeqqaassavara isumaqatigiinniarnerit tamaasa SIK annertuumik qaffaatissanik piumasaqaateqartarmat aammalu ilisimavara Kattuffiit allat taamatuttaaq piumasaqartartut. Tamatigullu aana akissutigineqartuartartoq: Namminersorlutik Oqartussat aammalu Kommunit akissaqanngillat.
Kisianni paasinarsivoq kommunit aningaasaatinik ulikkaartut, taamaattumillu isumaqatigiinniangajaleratta matumuuna piumasaraarput aningaasarsiat 50 procentimik qaffassasut, tassami paasinarsivoq kommunit akissaqannginnerartarsimasut sunaaffa aningaasaatinik ulikkaarlutik.
Namminersorlutik Oqartussat kommunillu aningaasiviannut matuersaat SIK-p tigummin-ngilaa. Kisianni Avannaata Kommuuniani borgmesterip Avannaata Kommuniata aningaaserivianut matuersaat tigummivaa. Taamaattumik matumuuna piumasaraarput Avannaata Kommuniata inissiaataanni najugallit akiliutaat minnerpaamik 80 procentimik appartinneqassasut, paaqqinnittarfinnut akiliutit unitsinneqassasut, Avannaata Kommuniani akileraarut annertuumik appartinneqassasoq, ukiorpassuarnilu ilaasortarisimasagut utoqqalillutik utoqqaat illuanni najugaqalersimasunut utoqqaat illuinut akiliisinneqartarnerat taamaatinneqassasoq.
Pisortanut, malugalugu kommuninullu isumaqatigiinniarluta aallartilerpugut, matumuunalu SIK-miit piumasaqaatigaarput aningaasarsiat minnerpaamik 50 procentimik qaffaaffigineqassasut. Naatsorsuutigilluinnarparalu Avannaata Kommuniata borgmesteriata tamanna sukkanerpaamik tapersissagaa, paasinarsimmammi aningaasaatinik ulikkaartut.
Illillu borgmester Lars Erik Gabrielsen isumaqatigaakkit, akiligassat aningaasarsianut sanilliullugit annertuallaarput. Taamaattumik illit Avannaata Kommuniata karsianut matuersaat tigummigakku isumaqatigiinniarnissaq utaqqinngikkaluarlugu aallarniutigalugu aningaasarsiat pisissutigineqarsinnaanerat pitsanngorsaaviginiarlugu sukkanerpaamik ukua isumagipallassasigitit:
– Paaqqiinnittarfinnut akiliisitsisarneq unitsilli.
– Kommunit inissiaataanni najugalinnut akiliut 80 procentimik appartinneqarli.
– Utoqqaat Illuinut najugaqartunut akiliisitsisarneq unitsilli.
– Avannata Kommuniani akileraarut apparuk.
– Avannaata kommuniani sulisut aningaasarsiaat 50 procentimik qaffaaffigikkit.
Inissianik sanaartortitsigit, tassami aamma ilaasortarpassuagut Avannaata Kommuniani ukiorpassuit utaqqisariaqartarput initaarniarlutik.
Illimmi Avannaata Kommuniani aningaasivimmut matuersaat tigummivat, SIK-p tigumminngilaa. Taamaammat qulaani taakkartukkakka tassa illit aqagu qanoq iliuuseqarfigisinnaasatit, paasinarsivormi kommunerujussuit aningaasaatinik ulikkaartut.
Jess G. Berthelsen
Kattuffiup siulittaasua