SIK-p siulittaasua Jess G. Berthelsen, Naalakkersuisut siulittaasuata Kim Kielsenip ukiortaami oqalugiaataa pillugu taama oqaaseqarpoq.
Ukiut amerlasuut qaangiupput ukiortaami oqalugiaammik aatsaat taamak pitsaatigisumik tusarnaaramali. Ilaasortatta atugarisaanut tunngatillugu pitsaanerpaamik isaassivoq.
Sinerissami ilaasortatsinnut pitsaasuuvoq innaallagissamut, kiassaanermut aamma imermut akigitinneqartut appartinneqarnissaat qilanaarisinnaaleramikku.
Illoqarfinni angisuuni ilaasortatsinnut pitsaasuuvoq amerlanerusunik inissaqalernissaa.
Taamatullu suliffissaaleqisunut pitsaasuuvoq minnerunngitsumik inuusuttunut Naalakkersuisut tamatumunnga tunngatillugu iliuuseqarnialernerat, Jess G. Berthelsen oqarpoq.
Uanga aammattaaq nuannaarutigaara Naalakkersuisut aatitassarsiornerup aallartinnissaanut suli iliuuseqarniarnerat aamma aalisakkanut suliffissuarnut tunngatillugu qulakkeerniarmassuk aalisakkat amerlanersaasa Nunatsinni nioqqutissiarineqartarnissaat.
Illuatungaatigut nuannarivallaanngilara sulinermut ilanngaatip eqqunneqarnissaanut anguniagaq, tassuuna qulakkeerniarneqarluni sulinermi aningaasat pissarsiarineqartartut amerlinerunissaat, tassa suliffeerunnermi ikiorsiissutinik imaluunniit pisortanit ikiorsiissutinik pisartagaqarnermut taarsiullugu. Uanga ilanngaat imatut akerlerinngilara, kisianni qularutigaara tamatuma suliffissaaleqisut amerlassusiannut sunniuteqassanersoq, tassa maannakkut suliffissarsiorlutik nalunaarsorneqarsimasut 3.500 allanneqarsimareermata, Jess G. Berthelsen erseqqissaavoq.