SIK ukioq manna ”Sulisunut Sinniisutsialammik” toqqaasitsiniarpoq. Tamanna pissaaq nunatsinni tamarmi SIK-p isumaqatigiissutai malillugit sulisuusut kikkulluunniit taamatut toqqarneqartussanik namminneq innersuussuteqarnissaannut periarfissinnerisigut. Allagarsiussassaq SIK-p immikkoortortaqarfiinut nassiunneqartoq ima imaqarpoq:
SIK-MI ISUMAQATIGIISSUTIT TUNNGAVIGALUGIT SULISUNUT TAMANUT:
Illit sulisutut sinniisut suliffeqarfinni arlalitsigut atuuffeqarpoq, soorlu suliffeqarfimmi ajornartorsiuteqalissaguit illersortussaallutit. Sulisutut sinniisut suliffinnissaaq aamma atukkatit pillugit sunik tamanik oqaloqatigisinnaavat.
SIK-p sulisut sinniisaattut sulinerup pingaaruteqassusaata ukkatarineqarnissaa kissaatigaa, taamaattumillu isumassarsiamik nutaamik matumuuna saqqummiussivoq – tassalu UKIUMI SULISUNUT SINNIISUTSIALAMMIK toqqaaniarluni aalajangerpoq.
SIK-p ukiumut Sulisunut Sinniisutsialannik pingasunik ukiut tamaasa toqqaasarnissani kissaatigaa, SIK-milu siulersuisuunerit innersuunneqarsimasut toqqartassavaat. Sulisut sinniisaat ukiup Sulisunut Sinniisutsialaatut toqqarneqartut tamarmik diplominnatsinneqartassapput kiisalu aningaasartaqartinneqartassalluni 3.000 kr.-inik (akileraarut peereerlugu).
Siulersuisuunerit ukiup sulisunut sinniisutsialaanik toqqaallutik aalajangernissaminni makku pingaartissavaat:
A. Sulisut sinniisaattut sulilluartoq, sulisut sulisitsisullu akornanni suleqatigiilluarnissamik pingaartitsisoq,
B. SIK-mi ilaasortaanerup iluaqutissartai pillugit suliniuteqarluartoq aammalu,
C. Suliffimmi suleqatit isumaqatigiissutit tunngavigalugit pisinnaatitaaffiisa il. il. suliffeqarfimmi ataqqineqarnissaannik suliniuteqarluartartoq.
Maannakkut periarfissaqalerputit sulisutut sinniisorisavit ”Sulisunut Sinniisutsialak 2020”-mut toqqarneqartussanngorlugu innersuussinissannut.
Innersuussinissaq kingusinnerpaamik pissaaaq ulloq 18. novembari 2020.
Innersuussinerit uunga nassiutissavat sik@sik.gl – tassani nalunaarutigissavat kina ”Sulisunut Sinniisutsialak 2020”-mut toqqarneqassanersoq.
- Kina toqqarneqassava (atia kinguliaalu)?
- Sumi suliffeqarpa?
- Sooq illit sulisutut sinniisut ”Sulisunut Sinniisutsialak 2020”-nngortussatut toqqarneqassava?