Nunatsinni imaluunniit Danmarkimut angalassutissat katillugit 12,2 mio. kr. makitsinikkut agguaanneqarput piffissap qinnuteqarfiusup aggustip aallaqqaataani qaangiunnerata kingorna.
SIK-p Sulinngiffeqarluni Angalanermut Aningaasaateqarfianut (feriefondimut) qinnuteqarsimasut sms-ikkut ilisimatinneqaqqammerput 2022-mi nunatsinni imaluunniit Danmarkimut angalanissanut makitaasimasut – imaluunniit ajoraluartumik makitaasimanngitsut.
Taamalu qinnuteqarsimasut 594-it aappaagu feeriarnissaminnut qilanaalereersinnaanngorput. Taakkua agguagassarilerpaat 12,2 mio. kr. aningaasaateqarfiup siulersuisuisa ukiumut angalaffiusussamut akuersissutigisaat. Tassami inoqutigiit pineqartut assigiinngitsunik amerlassusillit nunatsinni ornitassanut assigiinngitsunut Danmarkimullu angalatinnissaat taama akeqartussaavoq.
2022-mi angalanissanut qinnuteqartut katillutik 3.784-iusimapput. Taakkua ilaat 1.859-it makitsinermi peqataasinnaasutut akuerineqarsinnaasimapput.
Makitsineq pivoq sulisut sinniisaasa ilaat Nuummi SIK-p immikkoortortaqarfianut atasut uku makitsisuullutik: Petra Filemonsen (Ippiarsuk) aamma Nuka Enoksen (Nuuk Imeq). Makitsinermi najuuppoq eqqartuussisoq Sikkerninnguaq Hard Lorentzen.
Feriefondip siulersuisui SIK-mit pisortanilu sulisitsisunit katitigaasut aammattaaq aalajangersimapput corona pissutigalugu angalasinnaasimanngitsut feeriarnissaannut pisissutissanik 1,5 mio. kr.-inik immikkoortitsiniarlutik.
Ukioq manna qinnuteqartitsineq siullermeerluni SIK-p nittartagaatigut toqqaannartumik allattuinikkut ingerlanneqarsinnaasimavoq, aammali maannamut pisarnertut immersugassamik pappialamik allattuinikkut ingerlanneqarsinnaasimalluni. Nittartakkakkut toqqaannartumik qinnuteqarsinnaaneq atorluarneqarpoq, tassa qinnuteqaatit affaannit amerlanerusut tassuuna qinnuteqaatigineqarsimammata.
Makitaasimasut makitaasimanngitsullu ulloq 19. oktobari 2021 sms-ikkut nalunaarfigineqarnerat ajoraluartumik kukkuluttorfiuvoq, tassa arlalissuit marlunnik sms-isimmata assigiin-ngitsunik nalunaarutitalinnik. Telefonikkut Facebookikkullu erseqqissaatigineqarpoq sms tigusimasaq siulleq atortuutinneqassasoq. Aappaa atortuutinneqassanngilaq. Ajutoorneq tamanna ajuusaarutigaarput.
Angalanissaminnut makitaasimasut ulluni qaninnerni SIK-mit allakkerivikkoortumik allagarsiumaarput immersugassamik imalimmik. Immersugassami tassani ilaatigut allanneqassaaq qaqugu angalassamaarnerluni.
► Una tooruk SIK-p Feriefondia pillugu paasissutissanik atuarumallutit
2022-mi angalanissanik makitsinermit. Saamerlermit: Sulisut sinniisaat Petra Filemonsen (Ippiarsuk), eqqartuussisoq Sikkerninnguaq Hard Lorentzen, SIK-mi siunnersorti Dorthea Josefsen aamma sulisut sinniisaat Nuka Enoksen (Nuuk Imeq).