Skip to content

Ilaqutariit 509-t 2023-mi akiliunneqarlutik feeriartussanngorput

SIK-p Sulinngiffeqarluni Angalanermut Aningaasaateqarfia (feriefondia) ippassaq inaarutaasumik sms-inik nassiussuivoq 2023-mi akiliunneqarluni angalanissanik qinnuteqarsimasunut.

Sms-it assigiinngitsut sisamaasut quppernerup matuma ataani atuarneqarsinnaasut ilaatigut tassaapput makitaasimasunut ilisimatitseqqinnerit, ilisimatitsissutigineqarluni allagarsiumaartut immersugassamik imalimmik, ilaatigut sumukarniarnermik nalunaaruteqarfiusussamik. Taamaalillutik qinnuteqarsimasut 509-t aappaagu feeriarnissaminnut qilanaarsinnaanngorput – ilarpassuisa nuliatik/uitik meeqqatillu 18-it inorlugit ukiullit aalla­qa­ti­gisussaallugit. Nunatsinni ornitassanut assigiinngitsunut imaluunniit Danmarkimut angalanissaminnik kissaateqarsimapput.

Aammali makinneqanngitsoortut tamatuminnga soorunami ilisimatinneqarput.

Aammattaaq allat ilisimatinneqarput makitaasimagaluarlutik tamanna atorsinnaassanngikkaat, tassa uppernarsaatissat piumasarineqartut tunngavigalugit paasinarsisimammat suliffigisaat Feriefondimut akiliisartuunngitsut.

Tassami Feriefondimik aaqqissuussineq sulisitsisut aningaasaateqarfimmut akiliuteqartarnerannik tunngaveqarpoq. Sulisoq suliffimmi aningaasaateqarfimmut akiliuteqartanngitsumi sulisuuguni soorunami aningaasaateqarfiup taassuma akiligaanik angalanissamut pisinnaatitaaffeqanngilaq.

Makitsineq pivoq ulloq 9. septembari 2022 sulisut sinniisaasa ilaat Nuummi SIK-p immikkoortortaqarfianut atasut uku peqataasoralugit: Anda Markussen aamma Jerine Egede. Makitsi­ner­­mi najuuppoq eqqartuussisoq Stine Dana Lynge.

Makitsinerup kingorna isumagisassat arlallit ingerlanneqaqqaarallarput, soorlu makitaasimasut piffissami qinnuteqarfiusumi maajip aallaqqaataata aggustillu aallaqqaataata akornanni akissarsiaasa allagartaat uppernarsaatissat pissarsiariniarneqarlutik. Tassami akissarsiat allagartaatigut takuneqarsinnaasarpoq sulisitsisorisaq feriefondimut akiliuteqartartuunersoq.

Una tooruk feriefondip malittarisassai atuarusukkukkit suliffeqarfiillu suut aningaasaateqarfimmut akiliuteqartartuunersut paaserusukkukku

2023-mi angalasussanik makitsinermi najuuttut: Feriefondip allattaa Dorthea Josefsen, sulisut sinniisaat Anda Markussen, eqqartuussisoq Stine Dana Lynge aamma sulisut sinniisaat Jerine Egede.

Sms-ikkut ilisimatitsissutit nassiunneqartut

Ulloq 18. oktobari 2022, tamatumaluunniit kinguninnguatigut sms-it nassiunneqartut assigiinngitsut sisamaasut imaapput:

Sms 1:

Qujanaq SIK-p Feriefondianut qinnuteqaravit. 2023-mi angalanissamik qinnuteqaatit ajoraluartumik makitaanngilaq, aappaaguli qinnuteqaqqissinnaavutit.

Sms 2:

SIK-p Feriefondianit 2023-mi angalanissamut makitaasimanerit ajoraluartumik atorsinnaanngilaq, tassa akissarsiavit allagartaat nassiussat naapertorlugu suliffiit aningaasaateqarfimmut akiliisartuunngimmat.

Sms 3:

SIK-p Feriefondianit 2023-mi angalanissamut makitaasimagavit qinnuigineqarsimavutit akissarsiavit allagartaata ataatsip assilineranik maajip aallaqqaataata aggustillu aallaqqaataata akornannit pisumik uppernarsaatissamik nasseqqulluta. Periarfisseqqinneqaraluarlutit taamaaliorsimannginnavit matumuuna nalunaarfigaatsigit ajoraluartumik makitaasimanerit atorsinnaanngitsoq.

Sms 4:

Siusinnerusukkut nalunaarutigineqareersutut, SIK-p Feriefondianit 2023-mi angalanissamut makitaavutit. Tamatumunnga tunngatillugu immersugassamik nassillutit allaffigineqarumaarputit e-mailikkut imaluunniit allakkerivikkut, qinnuigineqarlutit immersugassaq immersoriarlugu Feriefondimut nassiutissagit.