Ulloq 24. oktobari 2023 makitsinermit. Tamanna pisarnertut pivoq sulisut sinniisaannik eqqartuussisumillu peqataasoqarneratigut. Saamerlermit: Nuka Enoksen (sulisut sinniisaat), Virna Kromann (kredsretimi eqqartuussisoq), Inge Lennert (sulisut sinniisaat), Aviaq Petersen (SIK-p allattoqarfianit) aamma Dorthea Josefsen (feriefondip allattaa).
Kingullermik tallimanngormat sinerissami ilaqutariit 209-t qilanaajummernartumik sms-erfigineqarput. 2024-migooq akiliunneqarlutik angalanissaminnut SIK-p feriefondianit makitaapput.
Makitsinikkut angalanernik SIK-p isumaqatigiissutai malillugit sulisuusunit piumaneqarluartartunik qinnuteqarsimasunut katillutik 1.855-iusunut sms-it nassiunneqartut assigiinngitsut pingasuupput.
Sms-ip aappaa makitsinermut ilaatinneqaraluarlutik ajoraluartumik makitaanngitsoortunut nalunaarutaavoq. Taakkuli inussiarnersumik ilisimatinneqarput piumagunik aappaagu qinnuteqaqqikutsoorsinnaasut.
Sms-it pingajuat makitsinissamut peqataatinneqarnissamut piumasarisaasut ilaannik ataatsimik arlalinnilluunniit eqqortitsinngitsoorsimasunut ilisimatitsissutaavoq. Taakkulu linkimik nassinneqarput SIK-p feriefondiata angalanissanik makitsisarnernut malittarisassaanik SIK-p nittartagaani atuarneqarsinnaasunik paasiniaasinnaaniassammata.
Makitsineq oqaluttuarisaanermi eqqaamasarialik
Siorna ilaqutariit 509-it makitaapput. Tassa ukioq manna taakkua affarinngilaalluunniit. Tamatumunnga pissutaavoq SIK-p isumaqatigiissutai malillugit sulisuusut ilarpassui angalanernut makitsinikkut pineqartartunut qinnuteqarsinnaajunnaarnerat. Tassami isumaqatigiissutit nutaat malillugit taakku ukioq allortarlugu akiliunneqarlutik angalanissaminnut pisinnaatitaaffeqalerput 1. apriili 2024-mi atuutilersussamik – taamaattumillu makitsinikkut angalasarnernut qinnuteqarsinnaajunnaarlutik.
Taamaattumik ukioq manna SIK-p feriefondianut ukiuuvoq oqaluttuarisaanermi malugisarialik. Feriefondi maanna angalanernik assigiinngitsunik arlariinnik ingerlataqalerpoq – tassa siullermik makitsinikkut angalanernik agguaasarnerrnik nalunngeriikkatsinnik, aappassaanillu ukioq allortarlugu sulinngiffeqarlutik angalanissamut akiliussisarnissanik sulisoqatigiiaat aalajangersimasut pisinnaatitaaffigiligaannik. Sulisoqatigiiaat tassani pineqartut ukuupput:
-
- Niuernermi allaffinnilu sulisut (HK-t) Namminersorlutik Oqartussani, kommunini naalagaaffiullu suliffeqarfiini sulisut
- Meeqqerisut isumaginninnermilu ikiortit socialmedhjælperit socialhjælperilllu
- Peqqinnissamut ikiortit
- Oqalutsit nutserisullu
SIK sulisoqatigiiaat taakku angalanissaminnut qanoq allatsittarnissaannut ilitsersuutinik paasissutissiinissaminut maanna piareersaateqarpoq.