Makitsinermi peqataasut, saamerlermit: Sulisut sinniisaat Karl Kristian Magnussen, sulisut sinniisaat Haldora Johansen, eqqartuussisoq Kristine Olsvig aamma Feriefondip allattaa Dorthea Josefsen.
Ulloq 18. oktobari 2024 SIK-p Sulinngiffeqarluni Angalanermut Aningaasaateqarfia (Feriefondi) 2025-mi angalasussanik makitsivoq.
Aajuku kisitsisit makitsinerup inernerinik takussutisssat:
- Qinnuteqarnerit atorsinnaasut 535-t makitsinermi peqataatinneqarput.
- Taakkunannga 330-t makitaapput.
- 20-t utaqqisutut inissinneqarput (tassa angalanissanik makitaasimagaluartut ilaannik taamaatiinnartoqartarmat Feriefondi aalajangerami utaqqisut allattorsimaffiannik pilersitsisoqassasoq).
Qinnuteqarsimasut tamarmik sms-isiumaarput nalunaarfigineqarlutik makitaasimasut, utaqqisunut ilanngunneqartut imaluunniit makitaanngitsoortut.
Makitsineq pisarnertut sulisut sinniisaasa ilaannik marlunnik eqqartuussisumillu najuuttoqarluni ingerlanneqarpoq.
Makitsinikkut angalanissanik agguaassisarneq SIK-p feriefondiata aaqqissuussinerisa marluusut aapparaat, siunertaralugu SIK-ip isumaqatigiissutai malillugit akissarsiaqartinneqartut – taakkualu ilaqutaasa qaninnerit – sulinngiffeqarlutik angalanissaannut akiliussisinnaanissaq.
► Una tooruk Feriefondip aaqqissuussineri assigiinngitsut marluk pillugit paasisaqarumallutit
Makitsineq qarasaasiakkut ingerlanneqarpoq, inerneri skærmersuakkut takkuttarlutik.