NSIP-p ukiunik 70-liinera novembarip sisamaani pisoq ilaatigut ataqqinaammik ilaasortanngortitsinermik ilaqartinneqarpoq, tassa Aaninnguaq Falksen ataqqinaammik sulisartut peqatigiiffianni ilaasortanngortinneqarmat.
Aaninnnguaq Falksen Qeqertarsuatsianiit Nuummut nuukkami 1968-imi sulisartut peqatigiiffiannut ilaasortanngorpoq.
Taamani Ilinniarfissuup kollegiaani igaffissuarmi sulisunngorpoq, ilinniartut inuusuttuaqqat ilinniartitsisunngorniallu amerlasoorpassuit sullissimavai, nerisassaannik igganneqarnerannut peqataalluni – siullermik køkkenmedhjælperitut atorfeqareerami kingorna køkkenassistentinngorluni.
Aaninnguaq sulisartut peqatigiiffeqarneranni ukiorpassuarni ingerlatseqataavoq sulisut sinniisaattut aammalu SIK-p Nuummi peqatigiiffiani siulittaasup tulliatut/siulersuisunut ilaasortatut.
![](https://i0.wp.com/sik.gl/wp-content/uploads/2023/11/NSIPmi-ataqqinaammik-ilaasortaq-Aaninnguaq-aamma-Ujoorsi.jpg?fit=1024%2C912&ssl=1)
NSIP-p siulittaasuata Josef Therkildsenip allagartaq ataqqinaammik ilaasortaanermut uppernarsaataasoq Aaninnguaq Falksenimut tunniuppaa.