'/%3E%3C/svg%3E){kind=small}
Danmarkimi sulisartut kattuffissuata FH-p sapaatip-akunnerani kingullermi ataatsimeersuarnerneranut qaaqqusatut peqataavoq.
SIK sinnerlugu peqataapput siulittaasoq Jess G. Berthelsen aamma siulittaasup tullia Sofie Svendsen.
Asseq matuma qulaaniittoq: Saamerlermit: FH-p siulittaasua Morten Skov Christiansen, Jess G. Berthelsen, Sofie Svendsen, siulittaasup tullia taartaasartoq Nanna Højlund aamma siulittaasup tullia Flemming Grønsund.
Sofie Svendsenip kattuffissuup sulisartut kattuffiinik assigiinngitsunik katillugit 1,3 millioninik ilaasortaqartunik tunuliaqutaqartup ataatsimeersuarneranut peqataanermini misigisani ima oqaatigaa:
”Soorunami sulisartunut sullissinermik anersaaqarlutik assullu akisussaassuseqarnermik peqarlutik ataatsimeersuarnermik ingerlatsinerat maluginiarnarpoq nuanneqalunilu malinnaalluni. Danmarkimi kattuffiit taamatut suleqatigiinnermik peqarnerat nukimmik angisuumik pilersitsisimasoq takuneqarsinnaavoq.”
Sorpassuit ataatsimeersuarnermi sammineqarput. Sofie Svendsen oqaluttuarpoq silassorissuusiat eqqartorneqartunut ilaasut, tamakku suliffinni maanna atugaalereermata sulisartunut iluaqutissanngorlugit qanoq pineqarnissaat eqqartorneqarluni. Inuusuttut suliffeqarlutik ilinniagaqarlutillu ingerlanissaat kattuffeqarnermilu peqataatinnissaat/ilaasortaanissaat aamma eqqartorneqarpoq.
Allaffinni niuernermilu sulisut kattuffiata naalagaaffimmut tunngasortaani HK Stat-imi siulittaasoq Heidi Juhl Pedersen oqaloqatigineqarpoq ataatsimeersuarnermi peqataanera iluatsillugu. Tassami nunatsinni suliffeqarfiit Danmarkip naalagaaffianut atasut isumaqatigiissutitsinnik atuisut Danmarkimi atugassarititaasut assigalugit inissinneqartussaapput. Tamatumani suleqatigiinnikkut alloriarfiusinnaasut pillugit iluatsillugu oqaloqatigiittoqarpoq.
Ataatsimoornerulerpugut
FH-p ataatsimeersuarnerani kattuffissup siulittaasuata tullia Nanna Højlund aamma SIK-p siulittaasua Jess G. Berthelsen scenemut qaqitillugit oqaloqatigiissinneqarput.
Amerikamiut ittorsuata Trumpip Kalaallit Nunaannut qaninngoorniarnerujussua kalaallit sulisartuusut akornanni nalornisoornermik pilersitsisimavoq. Aammali sioorasaarinerit kalerrisimalissutigalugit Danmark Kalaallit Nunaallu ataatsimoornerulerput. Tamananna Jess G. Berthelsenip aamma Nanna Højlundip inersuarmi ataatsimeersuarfiusumi scenemit oqaatigaat.
Kalaallit Nunaannut tapersersuineq arlalitsigut saqqummiunneqartareerpoq. Taama ukioq manna januaarimi nunani avannarlerni sulisartut kattuffii ataatsimoorlutik oqaaseqaateqarput kalaallit namminneerlutik siunissaminnik aalajangiisinnaatitaanerat erseqqissarlugu.
(Tusarfik: www.fho.dk)