'/%3E%3C/svg%3E){kind=small}
Sulisut sinniisaat sulisartullu peqatigiiffiini siulersuisut nunaqarfinni illoqarfinnilu SIK-mut ilaasortassarsiussallutik taamalu sulisartut peqatigiiffeqarnerata siunertaanik pitsaasumik siaruarterissallutik tunuarsimaanngivipput.
Assilissat Qasigiannguani Nuummilu sulisartut peqatigiiffiinit nassiussarsiatta tamanna uppernarsarpaat.
Qasigiannguani sulisartut peqatigiiffiata siulittaasuata tulliata Mette L. Nikolajsenip nunaqarfimmi Ikamiuni assilisani marluk nassiuppai. Tassami peqatigiiffik nunaqarfimmi tassani ilaasortassarsiuutaa SIK-mut ilaasortaaneq pillugu paasisitsiniaavoq, ataatsimiisitsilluni takussutissanillu agguaalluni. Takukkit quppernerup qulaani matumalu saamia’tungaani Ikamiuni assilisat. Ikamiuniinnertik iluatsilluarnerarlugu Mette L. Nikolajsen unnersiorpoq.
Nuummi sulisut sinniisorpaalui ullut sisamat ingerlaneranni niuertarfeqarfimmi Nuuk Centerimeeqattaarsimapput, inunnit saaffigineqarsinnaallutik, taamalu ullut taakkua ingerlaneranni nutaanik qulinik ilaasortanngortitsisimallutik.
Nuuk Centerimi iliuuseqarneq taamatuttaaq nuannersumik misigisaqarfiuvoq, tamannalumi aamma assinit matuma ataaniittunit malugineqarsinnaavoq.
Sulisut sinniisaat nutaamik ilaasortassarsisut. Saamerlermit: Julie Jørgensen (AKO Miniklub), Aviaja Ikila Abelsen (Sermersooq Kredsret), Lars-Gerth Lynge (Ilisimatusarfik) aamma Laila Motzfeldt-Rasmussen.
Sulisut sinniisaat Royal Arctic Line-meersut. Saamerlermit: Kjeld Frederiksen, Najaaraq Lyberth aamma Nuka Ulrik Wind.