Tallimanngornermi septembarip 9-ani SIK-p Sulinngiffeqarluni Angalanermut Aningaasaateqarfia 2023-mi angalarusullutik qinnuteqarsimasorpassuarnik makitsissaaq.
Makitsinermi peqataatinneqartut tamarmik tamatuma kingorna sapaatip-akunnerani tulliuttumi piaarnerpaamik sms-ikkut ilisimatinneqarumaarput makitaasimanersut makitaasimannginnersulluunniit – nunatsinni imaluunniit Københavnimut angalanissamut.
Piffissap qinnuteqarfiusup aggustip aallaqqaataanut killeqartup qaangiunnerata kingornatigut SIK-p Sulinngiffeqarluni Angalanermut Aningaasaateqarfiata allattoqarfia qinnuteqaatinik katersuillunilu misissuilerpoq.
Maannakkorpiaq oqaatigisinnaanngilarput qasserpiaat 2023-mi angalanissanik qinnuteqarsimanersut taakkualu ilaat qassit makitsinermut pissanngatigineqartartumut peqataasinnaatitaassanersut.
Oqaluttuarisinnaavarpulli 2022-mi angalarusullutik siorna qinnuteqartut 3.784-iusimammata. Taakkunannga 1.859-it makitsinermi peqataasussanngorlugit akuerisaapput. Taavalu tassa ilaqutariit 594-it makitaapput – aasallu matuma ingerlanerani taakkua amerlanerpaartaat angalareersimalerput.
Aamma oqaatigisinnaavarput makitaasut taakkua 594-it angalanerannut 12,2 mio. kr.-it atorneqarmata. Tassami inoqutigiit pineqartut assigiinngitsunik amerlassusillit nunatsinni ornitassanut assigiinngitsunut Danmarkimullu (Københavnimut) angalatinnissaat taama akeqarami.
Sulinngiffeqarluni angalanermut aningaasaateqarfiup siulersuisui sapaatip-akunnerani tulliuttumi ataatsimiittussaapput ilaatigut isummerfigissallugu 2023-mi angalatitsinissamut aningaasat qanoq amerlatigisut atorneqassanersut.
Septembarip qulingiluaani makitsinissaq pisarnertut SIK-p illuani Nuummiittumi pissaaq, sulisut sinniisaat toqqakkat makitsisuussallutik, eqqartuussisumit malinnaaffigineqarlutik.
► Sulinngiffeqarluni angalanermut aningaasaateqarfik pillugu paasissutissat – una tooruk