KNI A/S naatsorsuutitigut amigartooruteqarami sipaarniartariaqqalernera soorunami paasinarpoq, tassami ukiut tamaasa taamatut amigartooruteqartaruni inuiaqatigiit aningaasaatigimmatigit aamma naggataatigut uagut inuiaqatigiit tamatta eqqugaassagatta. Tassami KNI Pilersuisoq inuiaqatigiit pigaarput, inuiaqatigiittullu aningaasalersorlutigu.
SIK-miit qassissaa oqariartuutigilernerparput siumut ungasissumut pilersaarusiorniarta. Kujataani aningaasarsiorfissarput aatsitassarsiorneq aallartinniartigu, il.il. Ila’ ila’ ukiut taamannanngulerpagut SIK-miit nillialluta. Kisianni upperineqarpasinneq ajorpugut.
Ullumikkut inuiaqatigiit taamatut aningaasakilliornermut inissinnerput nammineq akisussaaffigaarput, piffissaagallartillugu qanoq iliuuseqarsimannginnatta.
Maannakkut aaliangertoqarpoq nunaqarfinni pisiniarfiit ammasarneri sivikillilerneqassasut. Aanali ajortua: Ilaasortatta ulluinnarni inuuniarnerat annertuumik innarlerneqassaaq. Ilami kia, minnerunngitsumik nunaqarfinni, 4 tiimiinnaq aningaasarsiaqarluni inuussutigisinnaammagu? Tamanna ajornavippoq.
Suliffeqarfinni allani takusareerparput tiimit suliffiusussat annikillerneqaraangata sulisussaaleqilertartut. Pilersuisumut aamma tamanna atuummat sulisussaaleqinerup annertusineranik kinguneqassaaq. Minnerunngitsumillu nunaqarfinni inuerukkiartorneq aatsaat iluamik sukkatsissaaq.
Taamaattumik Inatsisartut, inuiaqatigiit suniarnerluta aaliangertariaqalerpugut. SIK-mi ukiorpassuit nilliaatigiuagarput, siumut pilersaarusiornissaq ilumut pisariaqalivimmat.
Jess G. Berthelsen
SIK-p siulittaasua