SIK-p allattoqarfianut kingullertigut takkuttoqartarpoq ilaasortat akiliutaasa 1. apriili 2022-mit qaffaateqarnerannut e-mailikkut maalaarutinik amerlanngikkaluartunik. Tunuliaqutaasut naatsumik nassuiarlugit allattoqarfik maalaartunut akissuteqarpoq – tassa peqatigiiffinni SIK-mut atasuni amerlanerpaani ilaasortaanermut qaammammut akiliutit 5 kr.-init 15 kr.-inut qaffaateqarnerat 2021-mi septembarimi kattuffiup ataatsimeersuarnerani aalajangiinerup kingunerigaa.
Maalaarutinut akissummi erseqqissarneqarpoq pineqartumut tunngatillugu aalajangiisussaviusoq tassaasoq SIP, tassa sumiiffimmi sulisartut peqatigiiffiat SIK-mut ilaasoq.
Tamanna ima nassuiaatissaqarpoq:
Ullumikkut aaqqissuussineq atuuttoq malillugu ilaasortat ataasiakkaat akiliutaat aalajangersimasunut marlunnut agguagaapput – peqatigiiffik sumiiffimmi suliniutinut atugassanik agguagarsisarluni, kattuffillu nuna tamakkerlugu atugassanik agguagarsisarluni.
Kattuffiup allattoqarfiata nuna tamakkerlugu ilaasortanik ataasiakkaanik sullissinerani suliassat amerliartortut malinnaaffigineqarsinnaaqqullugit SIK-p septembarimi 2021-mi ataatsimeersuarnerani (peqatigiiffiit tamarmik aallartitaannit peqataaffigineqartumi) aalajangiunneqarpoq kattuffiup ilaasortat ataasiakkaat qaammammut akiliutaannit agguagarsiassai 15 kr.-inik ilaneqassasut.
Tamanna ilaasortat akiliutaasa iluisigut iluarsiinerussammat aalajangiineq tamanna ilaasortat akiliutaasa katinnerisa qaffannerannik kinguneqartariaqanngikkaluarpoq. Taamaattumillu kattuffiup ataatsimeersuarnerani peqatigiiffiit kajumissaarneqarput akiliutinit aggugarsiassatik kattuffiup agguagarsiassaasa amerlissutaasa nalinginik ikileqqullugit, ilaasortat akiliutaat taamaalillutik qaffannginniassammata.
Kajumissaarineq tamanna tunngavissaqarluarpoq, tassa peqatigiiffiit aningaasaqarnerat ataatsimut isigalugu isumannaannerulersimaqimmat ukiualuit matuma siornatigut peqatigiiffiit naatsorsuuserinerata kattuffimmit qitiusumik ingerlanneqalernerata kingornatigut.
Sulisartut peqatigiiffiisa SIK-mut atasut 20-usut ilaasa sisamat kajumissaarineq tamakkiisumik malippaat. Allat kajumissaarut ilaatigut malippaat. Allallu aalajangersimapput kajumissaarut malinniarnagu, taamalu taakkunani ilaasortaanermut akiliutit qaammammut 15 kr.-inik qaffallutik 2022-mi apriilimiit.
”Taamaattumik akiliutit qaffannerat naammagittaalliuutigissagaanni sumiiffimmi peqatigiiffik attavigisaq saaffigisariaqarpoq. Matumuuna neriuppugut pissutsit qanoq ittuunerat tunuliaqutaasullu naammaginartumik nassuiarlutigit,” SIK-p allattoqarfianit akissutit taama naggaserneqarput.