Pisortat SIK-llu akissarsiat sulinermilu atugarisat pillugit isumaqatigiinniarnerat sivisuumik ingerlanneqareersoq paasinarsivoq Namminersorlutik Oqartussat kommunillu sulisutik soqutaanngilluinnartutut isigilersimagaat – tassami maannakkut allaat ilinniarsimasunut nalunaaquttap-akunneranut taamaallaat qaffaatissanik 92 ørenik neqerooruteqarput.
Maannakkut nunatta aningaasarsiornera ajunngitsutut nalilerneqartariaqarpoq. Ajunngitsumik ingerlaneq tamanna minnerunngitsumik sulisut pilersitaraat. Paasiuminaapporlu taava sooq sulisut taamak suusupagineqartigissanersut.
Aamma maannakkut paasivarput suliffeqarnermut ilanngaat erniinnaq eqqunniarneqanngitsoq. Taavami sooq aningaasat tassunga atugassaagaluit sulisartut akissarsiaasa pitsannguallaatissaattut atorniarneqanngillat?
SIK-mi ilaasortatsinnut eqqumiiginarluinnarpoq mittarfissuit koruuninik 3 milliardinik akeqartussat maannakkut sananiarlugit eqqartorneqartillugit, piviusunngortikkaluttuarneqalersullu, illuatungaatigut aningaasat taakkua mittarfiliassanut atugassat ilaannamininnguinilluunniit sulisartunut illuartitsisoqarniannginnera.
Kiisalu qinersisoqaleraangat kikkut tamarmik SIK-p isumaqatigiissutaanik atuisut aningaasarsiakippallaarnerarlugit oqariartortarput. Naanguku taakkua? Aasit qineqqusaarutaannaasimavugut? Immaqamiaasit puioreeramisigut.
Nunatsinni sulisitsisut annerpaartaat, kommunerujussuit, apererusunnarput ilumut sulisutik taamak suunngitsigisutut isigineraat, allaat ilinniarsimasunut taamaallaat nalunaaquttap-akunneranut 92 ørenik qaffaaniarlutik.
Maannakkut SIK-p isumaqatigiissutaanik atuisut akissarsiaat akiligassanut malinnaasinnaanngilluinnarput. Tamanna kommunit aamma Namminersorlutik Oqartussat ilisimaqqissaaraluarpaat, taamaattoq qanoq iliuuseqarusunngillat. Ata, politikerit assasi errortorniaqinasit oqarlusi isumaqatigiinniarnermut akulerunniarasi. Taamaattoqanngilaq! Maannakkununa ilissi isumaqatigiinniarnermi killiliussasi unittoortitsisut – akisussaaffimmik tigusillusi qanoq iliuuseqarniaritsi.
Inussiarnersumik
Jess G. Berthelsen
SIK-p siulittaasua