Akisussaassuseqanngitsuliorneq

Aalisarnermut Piniarnermullu Naalakkersuisoq aalajangersimavoq – imaluunniit Naalakkersuisut aalajangersimapput – qaammatikkaartumik qaleralittassiisarneq taamaatinniarlugu, allaffissornarpallaaqimmanngooq.

Siullermik qularutissaanngilluinnarpoq ukiumoortumik pisassiisaleqqinnissami qaleralittassat aappaagu ukioq qiteqqutiinnartoq nungunneqarumaartut.

Taamaattoqarnerani aalisartut isertitassatik isertissaqqaarpaat. Annertunerpaamilli eqqorneqartussat tassaapput aalisakkeriviit, minnerunngitsumillu sulisartut kattuffianni ilaasortavut angerlartiinnarneqartariaqalersussat.

Taamatut pisoqarpat allaffissornerujussuaq alla pilersinneqassaaq – tassa suliffeerunnermi ikiorsiissutinik tunioraalernermi allaffissornerujussuaq.

Taannaannaanngilaq. Ilaasortatta isertitaat millerujussuassapput, taamatullu pisoqarnerata kingunerisaanik ikiorsiissutit allat aamma aallartittariaqalissapput allaffissornermik annertuumik pilersitsisussat. Eqqaamaneqartariaqarpormi ilaasortavut taamaallaat sap. ak. 13-ini suliffeerunnerup nalaani ikiorsiissutinik pissarsisinnaammata.

Aaqqiiniartoqarsinnaanngilaq qaleralinnianut qaleralittassat nalimmassarsimanngikkaanni. Periarfissammi marlutuaapput: Qaleralinniat ikinnerulersinneqartariaqarput imaluunniit qaleralittassat annertoorujussuarmik amerlineqartariaqarlutik.

Naalakkersuisut qanoq iliornissamilluunniit pilersaaruteqaratik, imaluunniit nalulluguluunniit qaleralittassat nunguppata qanoq iliuuseqassanerlutik, qaammatikkaartumik qaleralittassiisarneq taamaatissinnaanngilaat. Tamanna akisussaassuseqanngitsuliorneruvoq.

Jess G. Berthelsen
Kattuffiup siulittaasua