Soorlu arlalinnit maluginiarneqareersoq SIK-p Facebookiatigut tuluttut oqaasertalinik titartagartalinnillu paasissutissiisoqarpoq allamiunut sammisitanik – suliffeqarnermi aalajangersakkanut tunngasunik. Ilaatigut taagorneqarlutik qaangiuttoornersiaqartussaaneq, ullunik qasuersaarfeqartussaaneq atorfinitsitaanermilu isumaqatigiissummik allagartaqarnissap qanoq pingaartiginera.
Taamatut paasisitsiniaalaarneq immikkut ittoq ukiuni kingullerni kangiamiut nunatsinnut suliartortut arlalissuit SIK-mut ilaasortanngorsimanerannik pissuteqarpoq. Ilisimaneqarpormi allamiut tamakku nunatsinni sulisitsisuminnit atornerlugaasarsimasut akilernerlugaallutik sulinngiffeqartussaanerallu ataqqineqarpiartarani, sulisitsisui allaat eqqartuussisulersuunneqartariaqarsimallutik. Taamaattumik sulisartut allamiut taakku atornerlunneqassanngikkunik paasissutissanik pisariaqartitsisut SIK-p allattoqarfianit malugineqarsimavoq.
Paasissutissat Facebookimut ilineqartut ilagaat titartakkanik filmiaraq sulisartut pisinnaatitaaffiinik tunngaviusunik Kalaallit Nunaannut suliartoraanni ilisimasariaqakkanik oqaluttuarinnittoq.
Video taanna aamma SIK-p nittartagaata quppernerani tuluttuumi saqqummiunneqarpoq, uani: https://sik.gl/en/
Allamiunut paasissutissat Facebookikkut siammarneqartut paasissutissanit SIK-p nittartagaani ilaasortanit allanit tamanit kalaallisut qallunaatullu atuarneqarsinnaareersunit tigulaagaapput, pingaartumik uaniittunit: ”Paasissutissat > Apeqqutigineqarajuttut”.