Soorlu nittartakkap matuma quppernerani “Isumaqatigiissutit”-ni takuneqarsinnaalereersoq aalisakkanik tunisassiornermik ingerlatsivimmik Arctic Prime Fisheries-imik (APF) nutaamik isumaqatigiissuteqartoqarpoq. Isumaqatigiissut SIK-p siulersuisuunerisa akuersissutigaat piffissamut 1. apriili 2022-mit 31. marsi 2024-mut atuuttussanngorlugu.
Ingerlatsiviup direktøria Hentzar Petersen SIK-llu siulittaasuata tullia Jokum Zeeb isumaqatigiissut nutaaq nalunaaquttap-akunnermusialinnut qaammammusialinnullu atuuttoq atsioqatigiissutigaat. Tamarmillu angusanik naammagisimaarinnipput.
Isumaqatigiinniarnermi angusanik allakkiaq naapertorlugu 48,36 procentit pitsanngoriaataapput. Agguaqatigiissitsinikkut taama nikeriarujussuarneq 18-it inorlugit ukiullit sulisutut 18-it sinnerlugit ukiulittulli akissarsiaqartitaalernerannik pissuteqarpoq. 18-it inorlugit ukiullit 18-it sinnerlugit ukiulittulli nalunaaquttap-akunneranut 1,75 kr.-inik qaffaavigineqaraluarpata pitsanngoriaatit agguaqatigiissillugit 12,20 procentiussagaluarput.
APF Kujataani Tunumilu arlalinnik tunisassiorfeqarpoq (Qaqortumi, Narsami, Nanortalimmi aamma Kuummiuni), sulisuilu katillutik 140-t missaanniipput.
Direktør Hentzar Petersen, APF, aamma SIK-p siulittaasuata tullia Jokum Zeeb isumaqatigiissummik atsioqatigiipput.