Skip to content

ASIP nammineq illuutitaarpoq


Aasianni sulisartut peqatigiiffiata illutaava Frederik Lyngesvej 30-miittoq.

Aasianni Sulinermik Inuussutissarsiuteqartut Peqatigiiffianni (ASIP) qangali pilersaarutaasi­mavoq namminerisamik illuutitaarnissaq. Ukiullu arfineq-marluk matuma siorna kontomik pilersitsisoqarpoq allaffiuutigaluni ataatsimiittarfiusinnaasumik illuutitaarnissamut aningaa­sanik ikisisarfissamik.

Taavalu ulloq 6. septembari 2021 tamanna piviusunngorpoq. Illu najugaqarfiusimasoq Frederik Lyngesvej 30-miittoq iluarsaanneqareerluni naammassivoq, ullorlu taanna iserterfigineqarluni.

ASIP-ip siulittaasua Qujana Fleischer unnersiorpoq ukiuni arlalinngortuni inissiap Blok 11-p kælderiani allaffigisimasaminnut naleqqiullugu maanna iserterfigisartik periarfissarinnerullunilu pitsaaneroqisoq.

Illumut iseraanni takuneqarsinnaapput saaffiginnittarfik, allaffik ataatsimiittarfillu inuit 30 missigisaasa isersimaffigisinnaasaat – iggaveeraqarporlu.

Illu tikikkuminartumiippoq pisiniarfissuup Pisiffiup timersortarfiullu akornanni inissisimalluni aqqusernup killingani, isikkivigissumi. Aasianni sulisartut peqatigiiffiat pilluaqquarput, kis­saal­lugit illu sulisartut peqatigiiffeqarnerannut iluaqutaallualerumaartoq.