Skip to content

Ataatanngortussanut periarfissiineq ilassineqarluarpoq

”Naggataatigullu nuannersumik tusarlissavassi,” SIK-p siulittaasuata Jess G. Berthelsenip Nuup Katersortarfiani maajip aallaqqaataani oqalugiaamminut naggasiutini taama aallartippaa. Tusagassarlu nuannersoq tassa: Anaanaasut sinerissamut aallarlutik erniartortaria­qar­nerini ataatan­ngor­tussat angalanissaannut SIK-p Isumaginninnermut Aningaa­saateqarfiata akiliussinnaanngorpai. Meeraqarunillu 18-it inorlugit ukiulinnik taakku aamma angalanerannut akiliunneqarsinnaangorput.

Maanna maajimi sapaatip-akunnerisa pingajuanni ilaqutariit arlalissuit periarfissamik tamatuminnga atuerusullutik saaffiginnereersimapput. Tamatumunnga periarfissinneqartut tassaapput SIK-p isumaqatigiissutai malillugit sulisuusut.

Atuisut siullerpaat

Nuummi erniartortunut inigititami naapipparput Salome Adolfsen Qaqortormiu. Taanna ilaqutaalu periarfissamik nutaamik tamatuminnga siullerpaallutik tamakkiisumik atuisuupput – iluarusuutigeqalugu. Tassami tamarmik Nuummukaqataapput, aapparisaa ataatanngortussaq Peter M. Noahsen meeraallu Mateus (nukarlersaat marlunnik ukiulik), Paulus, Victor, Sorlannguaq-Ineqi kiisalu angajullersaat Brian 17-inik ukiulik.

SIK-p isumaginninnermut aningaasaateqarfiini sullissisup Dorthea Josefsenip Salome naa­sunik tuniartorlugu pulaarmagu ilaqutai peqaraluanngillat, naluttarfiliakaagaminngooq. Tassami angalaqatigiinneq taamaattoq iluatsillugu peqqinnartumik sammisaqaqatigiinnissaq tulluarluinnarpoq.

SIK-p ilaqutariinnut taamatut periarfissiinera Salome Adolfsenip qujamasuutigeqaa. Facebookikkut attavigisartagaasa ilaata SIK-p nittartagaani allaaserisaq qulequtaqartoq ”Ataatan­ngortussat angalanermut akiliunneqartalernissaat” Salomekkunnut delermagu takkua periarfissaminnik paasisaqariataarsimapput.

Tassami Salome erniartorluni Nuummukartussaareersimavoq. Taavalu SIK-p Nuummi quller­saqarfianut paasiniaapput. Tapiiffigineqarnissamummi periarfissaq nutaangaarmat suli ullu­in­nar­ni suleriaatsimut iluamik ilanngunneqarsimanngilaq. Aappariilli ilitsersorneqarput qanoq qinnuteqarnissaminnik. Taamaalillunilu ataatanngortussap meeqqallu Qaqortumit Nuummut uterlugulu angalaqataanissaat pisinnaanngorpoq.

Dorthea Josefsen SIK-p isumaginninnermut aningaasaateqarfiini sullissisuusoq Salome Adolfsenimut Qaqortormiumut (talerpillermut) naasunik tunniusseqqammerpoq. Salomep aappaa Peter qitornaallu tallimat marlunniit 17-inut ukiullit siullersaallutik periarfissaq nutaaq atorpaat, taamalu anaananngortussaq Nuummut erniartortoq akiliunneqarlutik ingiaqatigalugu.


Aaqqissuussinerup nutaartaa

Pineqartoq tassaavoq aaqqissuussinermi nutaaliaq. Isumaginninnermi aningaasaateqarfe­qar­neq 2009-mi SIK-p sulisitsisunik isumaqatigiissuteqarnikkut tunngavilermagu ilaquttap pe­ruluutaasumik napparsimanerani angalaqataanissamut, ineqarnissamut akissarsiassaraluanillu annaasanik matussutissinneqarnissamut qinnuteqartoqarsinnaanngorpoq.

Kingusinnerusukkut isaruartaarnissamut isaruartaaqqinnissamullu qinnuteqartoqarsinnaan­ngorpoq, tamannalu ullumikkut aamma atorluarneqaqaaq.

Meerartaarneq inuunermi misigisat annerpaartaasa ilagaat – minnerunngitsumik ataatan­ngor­tumut. Ukiunili kingulliunerusuni ataatanngortut erninermi najuunnissaminnut periarfissakilligaluttuinnarsimapput napparsimmaviit ernisarfiusut ikiligaluttuinnarnerat ilutigalugu.

– Tamanna iliuuseqarfigisariaqalerparput. SIK-p siulittaasua Jess G. Berthelsen, isumaginninnermut aningaasaateqarfiit pilersinneqarneranni maannamullu ingerlanneqarneranni siulersortaasoq taama oqariarluni tamatuminnga sulissuteqalersimavoq.

Taamaalilluni isumatigiissuteqarnikkut periarfissaqalerpoq ataatanngortussap illoqarfimmut erniffissamut utimullu angalanermini akiliunneqarnissaa, aammalu meeraqarunik taakkuttaaq ilaanissaminnut akiliunneqarnissaat.

Massakkut aammattaaq ineqarnermut akissarsiassaraluillu annaasat matussutissinneqarnissaannut qinnuteqartoqarsinnaalernissaa sulissutigineqarpoq.

Nittartakkami www.sik.gl isumaginninnermut aningaasaateqarfiit taakkualu tapiiffigisinnaa­saat pillugit paasissutissat sapinngisamik piaartumik iluarsineqassapput. Taamattaaq aningaasaateqarfinnut qinnuteqarnermi immersugassaq immersuinermullu ilitsersuut iluarsine­qas­sapput. Taava sulisartut peqatigiiffii il.il. ilisimatinneqarumaarput.