SIK-p Nakkutilliisoqarfiata juunip naanerani ataatsimiinnera arlalitsigut immikkuullarissuseqarpoq, oqaluttuarisaanermi immikkut taasariaqalerluni. Ataatsimiinnermit imaqarniliap kattuffilerisunut maanna nassiunneqareersimalernerani ataatsimiinneq eqqartoqqilaassavarput.
Siullermik, juunip 30-ani Ilulissani ataatsimiinneq SIK-p juulip aallaqqaataani kattuffittut ukiunik 70-inngortorsiorneranut aallarniutaavoq.
Aappassaanik, sineriassuarmi peqatigiiffilerisunit erseqqissarneqarpoq peqatigiiffiit ataasioqatigiinnissaat qanoq pingaaruteqartigisoq.
Pingajussaanik, SIK nunatsinni sulisartut peqatigiiffeqarneranni nagguiusutut nunanit allanit tapersersorneqarnermik nalunaarfigineqarpoq – tassa USA-mit, Danmarkimit nunanillu avannarlernit – Kalaallit Nunaata Trumpikkunnit sakkortuumik tatineqarnera erseqqissumik innersuussutigineqarluni.
Nalliuttorsiorneq
Ukiunik 70-innguinerup Ilulissani arsaattarfitoqqami malunnartinniarneqarnerani SIK-p siulittaasua aallarniilluni oqalugiartuuvoq. Aamma uku oqalugiarput:
- Avatangiisinut, Pinngortitamut, Nukissiuuteqarnermut Ilisimatusarnermullu naalakkersuisoq, Jørgen Rosbach
- Borgmester Lars Erik Gabrielsen
- Danmarkimi sulisartut kattuffissuannut FH-mut siulittaasup tullia, Nanna Højlund
- Nunani avannarlerni sulisartut kattuffiisa suleqatigiiffianni NFS-imi allattaaneq, Magnus Gissler
Ukioq 2026 aamma sulisartut peqatigiiffiinut arlalinnut 1956-imi juulimi Grønlands Arbejdersammenslutningip (GAS) pilersinneqarnerata siornatigut kingornatigullu pilersinneqartunut nalliuttorsiorfiuvortaaq. Nalliuttorsiortut pisoqaanersaraat Qaqortumi peqatigiiffik ukiut 80-it matuma siornatigut pilersinneqartoq, tassa ulloq 25. januaari 1946. Tamanna pillugu allaaserisaq atuarneqarsinnaavoq – una tooruk
Ataatsimoornissap pisariaqarnera
Nakkutilliisoqarfimmi ataatsimeeqataasut ilaata saqqummiussaqarneratigut oqallinneqatsiarpoq sulisartut kattuffiata iluani peqatigiiffiit akornanni attaveqarniarnermi avissaartuussutaasinnaasunik pissusilersoqqajaasarnerup isummersoqqajaasarnerullu anigorniarneqarnissaannut kajumissaarutaasumik.
Oqaatigineqarpoq suleqatigiinnissaq pillugu assammik isaassinerit itigartinneqaqqajaasartut, aammalu ”illoqarfilerngusaanneq” (imaappoq peqatigiiffimmi namminermi immikkut soqutigisat pinermik allanik suleqateqarusunnginneq) nuanniilliuutaasumik malunniuttartoq.
Oqaaseqartut tamarmik una kajumissaarutigaat: Ataatsimoorniarta, suleqatigiinniarta, kattuffik nunarpullu tamaat eqqarsaatigalugit.
Ersoqatiginnikkumasut kitaanit kangianillu
Cathy Feingold inuulluaqqussuteqarpoq pilluaqqusillunilu. Taanna pisortaavoq USA-mi suliffissuaqarnermi sulisartut kattuffiisa suleqatigiiffianni American Federation of Labor and Congress of Industrial Organizations-imi (AFL-CIO).
Præsident Trump-ip sioorasaarerpaluttumik Kalaallit Nunaannik tiguserusulluni nalunaaqattaarnera Cathy Feingoldip peqqusiileqinarnerarpaa. Tamanna USA-mi sulisartut kattuffiisa akuerinngilaat. – Sulisartut amerikamiut sinnerlugit ilissinnut tapersersuinerput nalunaarutigerusupparput, Cathy Feingold oqarpoq.
Danmarkimi Fagbevægelsens Hovedorganisationimut (FH) siulittaasup tullia Nanna Højlund aamma Nordens Fackliga Samorganisationimi (NFS) allattaaneq Magnus Gissler nakkutilliisoqarfiup ataatsimiinneranut peqataaapput.
SIK-p NFS-imut akuunera Magnus Gisslerip pingaaruteqarnerarpaa, tamanna nunani avannarlerni sulisartut kattuffeqarnerannut nukittorsaaqataammat. Nanna Højlundillu SIK-p aqqutissiuisuusimanera sulisartut kattuffeqarnerata Kalaallit Nunaanni sorlanilluarsimaneranut pissutaanerarpaa – inuit suliniuteqartut ukiualunni imaluunniit inuunertik tamangajaat peqataasarsimanerisigut.
Nakkutilliisoqarfiup ataatsimiinnerata pappialartaasa ilaat uani aaneqarsinnaapput:
► Siulersuisuunerit nalunaarutaat – una tooruk
► Nakkutilliisoqarfiup ataatsimiinneranit imaqarniliaq – una tooruk
Qulaaniittoq: Cathy Feingold, pisortaq, American Federation of Labor and Congress of Industrial Organizations (AFL-CIO).
Ataaniittut: Nanna Højlund, siulittaasup tullia, Fagbevægelsens Hovedorganisation (FH), aamma
Magnus Gissler, allattaaneq, Nordens Fackliga Samorganisation (NFS)