Maanna ukiumi 2022-mi qaammammi kingulliup tulliani oqarsinnaanngorpugut sulisartut kattuffiata SIK-p aaqqissuussaanerani taaguut nutaaq ”attaveqaatit” timitalersorluarneqalersimasoq.
Tassa kattuffiup malittarisassaani nutaani 2021-mi ukiakkut ataatsimeersuarnermi akuersissutigineqartuni aalajangersakkanut ilaavoq nunaqarfinni illoqarfinnilu SIK-mut atasunik peqatigiiffeqanngitsuni attaveqaatinik toqqaasoqartassasoq. Maannalu 2022-p ingerlanerani attaveqaatit siulliit 25-t allattugaatigineqalerput.
Inuit toqqarneqartut taakku nunaqqatigiinni SIK-mut ilaasortaasut, kattuffiup sulisartullu peqatiiiffiata (kattuffiup immikkoortortarisaata) qaninnerup akornanni tassa attaveqaataasussaapput.
Taava ulluni 11. – 13. oktobari attaveqaatit siullerpaamik katersuutsinneqarput.
Attaveqaatit qulit katersuunnermi Nuummi Hotel Hans Egedemi ingerlanneqartumi peqataapput. Ilaatigut sila pissutigalugu peqataasussaagaluit arlallit peqataanngitsoorput. Taamaattorli ulluni pingasuni ataatsimiinneq nuannersumik imaqarluartumillu katerisimaarfiuvoq.
Qulequttat sammineqartut
SIK pillugu paasissutissiisoqarpoq, kattuffiup oqaluttuassartaa aaqqissuussaaneralu sammineqarlutik, allattoqarfimmi suliat paasissutissiissutigineqarlutik, kattuffiup peqatigiiffiillu malittarisassaat misissuataarneqarlutik kiisalu nittartakkap www.sik.gl-ip sulisartut peqatigiiffeqarneranni qanoq atorneqarsinnaanera sammineqarluni.
Aamma sulisoqarnermut tunngatillugu inatsisini aalajangersakkat atorneqarajuttut sammineqarput, soorlu avoqqaarliuteqartarnermut, mianersoqqussuteqartarnermut, suliamut tunngatillugu oqaloqatigiittarnermut, soraarsitsisarnernut peersitsisarnernullu tunngasut.
Ulluinnarni sulinermi atugassarititaasut aqqusaarneqarajuttut sammineqarput – soorlu qaangiuttoornerit, napparsimaneq, meeqqap napparsimanera, suliffeerukkallarnermi ikiorsiissutit, feeria kiisalu sapaatini nalliuttunilu ulluinnartigoortuni tapisiat eqqarsaatigalugit. Sammisat piviusuusaartitsinikkut videomut immiunneqartutigut paasiuminarsarneqarput.
Suliniutigissamaalikkat
Nunaqarfimminnut uterunik suliniutigerusutatik ullut pingajuanni kingullersaannilu allattorpaat. Ilaatigut makku suliniutigerusunneqarput:
- Nunaqqatinik aggersaalluni paasititsiniaanissaq
- Ilaasortanngortitsiniarnissaq
- Nittartakkap atorneqarnerulernissaa, paasissutissanik ujarlerfigineqarnerusalernissaa
- Pikkorissaanissat neqeroorutaasartut nittartakkamut ilineqartartut eqqummaariffiginerunissaat
- Messengerikkut isummersoqatigiittarfissamik pilersitsinissaq.
Pissarsiaqarluarnerarput
Peqataasut Nuummiinnertik iluatsillugu aamma kattuffiup illuanut pulaartinneqarput, tassanilu siulittaasoq Jess G. Berthelsen naapillugu.
Peqataasut taamatut naapisinneqarnertik iluarisimaaqaat, ilaatigut ullut pingasut sivikiginarsinnaasutut allaat nalilerlugit. Taamaattorli misigipput ilisimasamikkut paasisimasamikkullu pissarsiaqangaatsiarlutik – sulisartut kattuffianni attaveqaatitut ingerlatseqataanerminni ingerlateqqissinnaasaminnik.
SIK-mit sulisartut peqatigiiffiinut matumuuna kajumissaarutigerusunnarpoq nunaqarfinni illoqarfinnilu peqatigiiffeqanngitsunik attaveqaatinik toqqartuinertik ingerlatiinnaqqullugu.
Attaveqaatit katersuunneranni peqataasut ingerlatsisullu: Salliit saamerlermit: Ane Gabrielsen, Oqaatsut, Susanne L. Mølgaard, Kitsissuarsuit, Mette Jonathansen, Ikerasak, Anna M. Hansen, Qaarsut, aamma Nukannguaq Johansen, Ilimanaq. Tunorliit saamerlermit: Maren Johnsen, Qassiarsuk, Aka Josefsen, Kapisillit, Thomas Egede, Igaliku, Eva Jonathansen, Qeqertaq, Susanne Nielsen, Saqqaq, Jokum Zeeb (SIK-p siulittaasuata tullia) kiisalu Inge-Marie Rosing (SIK-mi siunnersorti).
Attaveqaatit SIK-p siulittaasuanut Jess G. Berthelsenimut pulaarnerannit.
Attaveqaatitaat ulluni pingasuni pikkorissaatigalugu ataatsimiinnertik sivikikkaluartiinnarpaat.