Nalunngiliuk SIK-p nittartagaani bibliotekinnguaqarmat sulisartut peqatigiiffeqarnerannut tunngasumik (Kalaallit Nunaanni kisiartaasumik)?
Atuagaateqarfik pineqartoq uaniippoq: Una tooruk
Tassaniittoqarpoq atuagassianik isiginnaagassiannguanillu amerlasoorsuunngikkaluanik – kattuffik, taassuma oqaluttuarisaanera sulisullu sinniisoqarnerat pillugit. Aamma sullivimmi tarnikkut avatangiisit pitsaasuunissaat pillugu paasissutissaqarpoq.
SIK-p allattoqarfianit kaammattuutigineqarpoq peqatigiiffiit siulersuisuisa sulisullu sinniisaasa internetsikkut atuagaateqarfinnguaq taanna alakkalaartarsinnaagaat, ulluinnarni sulisartoqatinik sullissinermut tunngatillugu isumassarsiorfigalugu.
Paasissutissanik allakkiami matumani immikkut eqqaasitsissutigerusupparput atuagaaraq novembarimi 2024-mi saqqummersinneqartoq, nalunaarutigerusullugulu naqitaaqqat nammineq naqiterneqarsinnaasut saqqummerseqqinneqarmata.
Atuagaaraq nutaaq
Atuagaaraq nutaaq taaneqartoq qulequtaqarpoq ”Ataatsimoorutta nukittunerussaagut”, tassa kattuffitsinni oqaasinnaaq sorpassuarnut tunngatillugu atorneqartoq. Ataatsimiisitsinerni, ilaasortassarsiornerni ilasseqatigiinnernilu assigiinngitsuni agguaatassatut suliaavoq. Qalipaatigissaartuuvoq naqiterivissuarmi amerlasuunngorlugu naqitigaalluni.
Imarisai SIK-p ingerlataanik tamalaanik paasissutissiipput. Kattuffik kikkunnut atava? Qanoq aaqqissuussaava? Ilaasortaminut sutigut ikiuussinnaava?
Peqatigiiffiit kattuffiup allattoqarfianut atuagaaqqanik amerlanerusunik nasseqqusinnaapput, pisariaqartitsigunik.
Naqitaaqqat pingasut nammineq naqiterneqarsinnaasut
Aamma naqitaaraqarpoq 2020-mili nittartakkamit anillatsinneqarsinnaanngorlugit suliarineqarsimasunik – nammineq printeri atorlugu naqiterneqarsinnaasunik, pappiala A4 ataaseq mumigiissillugu, taannalu pingasoqiusanngorlugu pertiterlugu. 2024-mili novembarimi peerallarsimavavut paasissutissat ilaat pisoqalisimasut iluarsiniassagatsigit.
Maannalu saqqummerseqqippavut. Naqitaaqqat tassaapput ”SIK-mut ilaasortaanerup iluaqutissartai”, taanna kattuffiup ilaasortaminut sullississutai pillugit naatsunnguamik paasissutissiiffiusoq, aamma ”SIK-p isumaginninnermut aningaasaateqarfii sutigut ikiuussinnaappat?” (siornatigut ima qulequtaqarsimagaluartoq: ”Peruluutaasumik napparsimalernermi ingiaqatigineqarneq”), isumaginninnermut aningaasaateqarfiit neqeroorutaat assigiinngitsut pillugit paasissutissiiffiusoq.
Aamma tuluttuumik naqitaaraqarpoq naqitaaqqap ”SIK-mut ilaasortaanerup iluaqutissartai”-sa asserpiaanik imalimmik. Sulisartut allamiut saaffiginnittaraangata taanna atorfissaqarluartarsimavoq – sulilu atorfissaqarluarluni.
Naqitaaqqat taakku atuagaaqqamut nutaamut tapertatut naatsorsuussaapput. Peqatigiiffiullu allaffiani nammineq printeri atorlugu naqiterneqarsinnaasuliaagaluartut SIK-p allattoqarfia qinnuigineqarsinnaavoq naqiterussilaaqqullugu, tamanna pisariaqartinneqarpat.