Beathe Hendriksen ataqqinaammik ilaasortanngortoq SIK-p Nakkutilliisoqarfiata Nuummi Hotel Hans Egedemi ataatsimiinnerani nalunaarutigineqarpoq.
Inuunermini piffissap annersaa sulisartut atugarisaasa pitsanngorsarneqarnissaat pillugu suleqataanermut atorsimavaa.
Beathe Hendriksen pillugu oqaaserineqartut eqikkarlugit taamaapput sulinermik inuussutissarsiuteqartut kattuffiannut SIK-mut ataqqinaammik ilaasortanngortinneqarmat – siullermik kattuffiup siulersuisuunerini aalajangiunneqartumik, tamatumalu kingorna SIK-p Nakkutilliisoqarfiata ataatsimiinnerani naqissuserneqartumik.
Beathe Hendriksenip SIK-mut sivisuumik akuunini 1973-imi aallartippaa, taamani GAS-imut (Grønlands Arbejder Sammenslutning) ilaasortanngorami, kattuffik taama ateqarallarmat.
1980-ikkut aallartinnerata kingornatigut kattuffimmi assigiinngitsutigut sallernut ilaalluni suliniaqataanera aallartippoq. Sulisunut sinniisuuvoq, IIP-mik (inunnik isumaginnittut peqatigiiffiannik) pilersitseqataavoq, Nuummi SIK-p immikkoortortaqarfianut siulittaasuuvoq, SIK-llu siulersuunerinut ilaasortaavoq, piffissap ilaani tassani allattuunerulluni. Aatsaat 2017-imi SIK-p ataatsimeersuarnerani nammineq piumassutsiminik taakkunannga tunuarpoq.
Beathep nuannaarluni killitsisimallunilu ataqqinaammik ilaasortanngortinneqarnini najuuffigaa, SIK-p Nakkutilliisoqarfia Nuummi Hotel Hans Egedemi ataatsimiimmat. Ataatsimiittut nikuillutik sivisuumik ersaartarnerat naasunillu qilertanik tunineqarneq ataqqinaammik ilaasortanngortitaanerup tulluartuutinneqarneranik ersersitsilluarput.