Mittarfiit tallilerneqarnissaasa aammalu benzinkortimik atornerluisimanerup SIK-mi ilaasortatta ulluinnarni atugaat soqutaajunnaarseqqasutut ippaat.
Ilisimaneqarluartutut meerartatta atugarisaat sorpassuartigut pitsaanngilluinnartutut inissisimapput. Taamatullu inissisimanerannut pissutaasut soorunami annerpaartaraat ilaasortatta ulluinnarni aningaasarsiaasa pisissutigineqarsinnaanerisa pitsaanngilluinnarnerat.
Maannali politikkikkut ukkatarineqartut angisuut mikisullu innuttaasut ulluinnarni inuuniarnerminni atugarisaannik tamakkuninnga puigorsaatitullusooq sunniupput. Massakkulliuna sulisartut aningaasarsiaasa sulinerminnilu atugarisaasa isumaqatigiinniutigineqarnerannut atatillugu politikerit periarfissaqaleraluartut pitsanngorsaataasussanik iliuuseqarnissaminnut – periarfissaq tamanna atorusunneqarpat.
Ataasiaannarata politikerit oqariartortut tusartarpavut kalaaleqatitta Danmarkimut nuussimasut nunatsinnut utertinnissaat sulissutiginiarlugu iliuuseqarniartut. Kisianni qanoq iliorlutik tamanna aaqqiiviginiarneraat suli paasisaqarfiginngilarput.
Danmarkimi naatsorsueqqissaartarfiup kisitsisaatai kingulliit naapertorlugit Danmarkimi kisimiittoq ukiumut aningaasarsiaqarpoq 320.000. kr.-inik. Aappaariillu isertitaqarput katillugit 966.000 kr.-inik.
Illuatungaatigut nunatsinni kisimiittut ukiumut isertitaat (malugalugu ukioq kaajallallugu sulisimagunik) 191.000 kr.-iupput.
Tassanittaaq aamma maluginiarneqartariaqarpoq Danmarkimi sorpassuartigut pisiniarfinni pisiassat nunatsinnut sanilliullugit akikinnerummata. Taamaalilluni aningaasarsiat pisissutigineqarsinnaanerat nunatsinnut sanilliullugu pitsaanerungaarpoq.
Pisortanik isumaqatiginninniarnerit aallartimmatali ulloq manna tikippaa Namminersorlutik Oqartussat kommunillu sunnguamilluunniit neqeroorutiminnik nikisitsiumanatik. Taamaattorli ulluinnarni oqariartussapput innuttaasut atugaat pitsanngorsaaviginiarlugit.
Qinikkat! Maannakkut isumaqatigiinniarnermut atatillugu periarfissaqarpusi qanoq iliuuseqassallusi: Tassa aningaasarsiat naammaginartumik qaffaaffigissallugit taamalu ulluinnarni meerartatta atugarisaat pitsanngorsaavigissallugit – taamalu aamma Danmarkimut nuttarneq unikaallatsissallugu.
Maannakkulli akisussaaffimmik qimarratiginnippusi pisarialimmik qanoq iliuuseqarumannginnissigut. Qinersisoqalerpat-aasiit qineqqusaarutaanissarput qularnanngik! Aammalu isumaqatigiinniarneq naammasseriarpat tusartualissavarput-aasiit inuttaasut atugarisaat naammaginagit akornassinnit oqariartortoqartoq.
Jess G. Berthelsen
SIK-p siulittaasua