SIK-mi aqutsisut siulersuisuunernik oqaloqateqareerlutik aalajangerput coronap tunillaassuussinnaaneranik mianersoqqussutit tusaaniarniarlugit, taamalu kattuffik nammineq periarfissani atorlugit peqataassasoq nappaatip siaruatsaalineqarnissaanut.
Tamatumani pineqarput angalanerit ataatsimiinnerillu SIK-p nammineq ingerlatai.
Isumaliutigilluareerlugu aalajangiunneqarpoq sulisut sinniisaasa pikkorissarnissaat Imm. 1 Narsarsuarmi ulluni 16.-19. marsi ingerlanneqartussaagaluaq kinguartinniarlugu, taamatuttaarlu Nakkutilliisoqarfiup ukiumoortumik ataatsimiinnissaanut atatillugu pisussarpaaluit ulluni 22.-26. marsi ingerlanneqartussat kinguartinniarlugit.
Sulisut sinniisaasa pikkorissarnissaat qaammatini qaninnerni pisussat taamaalillutik kinguartinneqarallarput, Nakkutilliisoqarfiullu ataatsimiinnissaa ukiamut pisussanngortinneqarluni. Pissutsit kingusinnerusukkut nalunarunnaameriarpata ulluliineqarumaarpoq.
Aammali allatigut angalanernik SIK ingerlataqarpoq – tassa sulinngiffeqarluni angalanermut aningaasaateqarfiup angalatitsinerinik aamma isumaginninnermut aningaasaateqarfiit napparsimasunut ingiaqataasunik angalatitsinerinik. Taakku pillugit uku taaneqassapput:
Sulinngiffeqarluni angalanermut aningaasaateqarfik: Angalanissanut nutaanut bilitsisiortorneq unitsinneqarallarpoq.
Isumaginninnermut aningaasaateqarfiit: Napparsimasunut ingiaqataasunut aallartussanut bilitsisiortorneq unitsinneqarallarpoq. Angerlarniartunulli bilitsisisarneq ingerlatiinnarneqassaaq.
SIK-p allattoqarfiata pissutsit malinnaaffigissavai immikkoortortaqarfiillu ilisimatittarumaarlugit nutaanik taasassaqaleraangat.
Taasariaqarportaaq SIK-p allattoqarfiata Nuummiittup saaffiginninniartut ornigunnaveersaaqqummagit. Inassutigineqarpoq saaffiginninnerit, soorlu feriefondimut isumaginninnermullu aningaasaateqarfimmut tunngassuteqartut, e-mailikkut imaluunniit telefonikkut ingerlanneqassasut nal. 9.00-p 14.00-llu akornanni.
Aamma atuaruk: Nakkutillisoqarfiup ataatsimiinnissaa sulisullu sinniisaasa pikkorissarnissaat corona pissutigalugu kinguartinneqarput