Sulisoq sulisitsisuminit eqqunngitsumik pineqaraangat isumaqatigiinnikkut aaqqiisoqarnissaa SIK-mit sulissutigineqarajuppoq. Ilaannili eqqartuussisulersuussinissaq pisariaqalersinnaasarpoq eqqartuussissuserisumik, advokatimik, ikiorteqarluni – tamannalu SIK-p aningaasartuutigisarpaa.
Eqqartuussisutigut aalajangiisoqarnissaa siunertaralugu suliat taamaattut marluk SIK-p advokatimik ikiorteqarluni kingullertigut ingerlatai matumuuna assersuutissatut oqaluttuarissavavut.
Sulisunik atornerluingaarneq
Suliaq siulleq tassaavoq Nuummi sulisitsisup sulisuminik nunanit allaneersunik atornerluerujussuarsimanera. Suliaq ingerlavoq taamalu suli naammassineqarani.
Tamatumani allatut ajornartumik eqqartuussisulersuussiniarnissaq ungaqqunneqarsinnaasimanngilaq. Sulisitsisormi pineqartoq SIK-mik oqaloqateqarusunngilaq.
Ilami aamma pineqartut ingasakkamik: Soorlu sulisut ukiuni arlalinni sulinngiffeqartinneqarsimanngillat. Aamma tupinnaannartumik nalunaaquttap-akunnerpassuini qaangiuttoortarsimapput tamatumunnga akissarsisinneqannguaratik. Taamatuttaarlu sapaatip-akunneranut døgnimik ataatsimik qasuersaarfeqartitsinissaq qaammaterpassuarni atorneqarsimanngilaq.
116.000 kr. isumaqatigiissutaapput
Suliap aappaa suli eqqartuussisunut annguteriarani isumaqatigiissuteqarnikkut naammassineqarpoq. Tamatumani pineqarpoq sulisitsisup sulisuminik soraarsitsisimanera, atorfinitsinneqarneranili isumaqatigiissut naapertorlugu bonusisiassaraluinik akilinngitsoorlugu.
SIK-p tamanna saqqummiummagu sulisitsisup advokatiata bonusisitsinissaq itigartilluinnarpaa. Sulisartulli kattuffiata advokatia eqqartuussisulersuussinialermat nipi allanngoriataarpoq. Sulisitsisoq isumaqatigiissuteqarnissamut akuersaalerpoq.
Taamalu maanna isumaqatigiissuteqartoqarsimalerpoq, tassa ilaasortarput bonusisinneqarmat 116.000 kr.-inik nalilimmik.
Taamatut isumaqatigiissuteqarneq anguneqarsimanavianngikkaluarpoq eqqartuussisulersuussinissaq SIK-p sulissutigilersimanngikkaluarpagu. Taamaattumillu siunissami ilaannikkut eqqartuussisulersuussiniartarnissarput naatsorsuutigineqartariaqarpoq.
►Ilisimasariaqakkat attuumassuteqartut: “Apeqqutigineqarajuttut” – apeqqutit akissutillu suliffeqarnermut tunngasut – una tooruk