Ippassaq sapaammi 4. septembari 2022 SIK-mi siulersuisuunernut ilaasortaasimasoq Hendrik Nielsen toqukkut qimaguppoq.
Hendrik Nelsen, Indaleeraq, Qaqortumi 2014-imi maajip aallaqqaataasiornermi assilineqarsimasoq – Sermitsiaq.AG-mut ilanngussaq.
Indaleeraq ukiuni qulingiluani SIK-p iulersuisuunerinut ilaasortaavoq, tassa siullermik 2001-miit 2009-p tungaanut, aappassaanillu 2012-miit 2013-imut, siulersuisuunernut ilaasortamik tunuartoqarneratigut ilaasortanngoqqilluni nammineq 2013-imi kattuffiup ataatsimeersuarnerani tunuarnissani tikillugu.
Indaleeraq inuunermini ukiuni amerlanerni aalisartutut inuussutissarsiuteqarpoq. Aammali naluneqanngitsutut Inatsisartunut ilaasortaasimavoq, aammalu Nunaqarfinnut Isorliunerusunullu Naalakkersuisuusimalluni. Taannaavorlu Inatsisartunut ilaasortaanermini nunatta namminerisaminik erfalasoqalernissaanik siunnersuuteqartoq.
Indaleeqqap innuttaaqatiminik sullissinissani pingaartikkamiuk Nunatta Ammeriviani sulinermi nalaani SIK-p Qaqortumi immikkoortortaqarfianut siulittaasunngorpoq, tamatumalu kingorna aammattaaq siulersuisuunernut ilaasortanngorluni.
Indaleeraq poliitikeriuvoq. Tamannalumi siulersuisuunernut ilaasortaanermi takutittarpaa, aammalumi suleriaaseqarluni sulisartut atugaasa ataatsimut pitsanngorsaavigineqarnissaat eqqarsaatigalugu. Soorunalumi aammattaaq aggerfimmini, tassa Qaqortumi, sulisartut atugaasa pitsanngorsaavigineqarnissaat pingaartilluguttaaq suleriaaseqarluni.
Indaleeqqap siulersuisuunerni qinikkatut akisussaaffini sunaanersoq paaseqqissaarsimavaa. Poliitikerinik sunniiniarnissaq pingaartittuuaa, tassalumi qinikkatut suliassavini paasilluarsimavaa atorluartarlugulumi.
Tamatuma saniatigut Indaleeraq ukiorpaalunnittaaq Sulisartut Højskolianni siulersuisunut ilaasortaasimavoq højskolip atorluarneqarnissaa pingaartitaasa ilagisimallugu.
Indaleeraq qanilaartuuvoq. Aamma periarfissannguaq tamaat atorlugu oqallitsitsinermik aallartitserusuttarpoq, taamaasillunimi inuit allat qanoq eqqarsaateqarnerat paasisaramiuk. Aammali angusaqarusussuseqarluni inuuvoq, angusaqarniaraangamilu uteriilluni angorusutani anguniartalugu.
Indaleeraq inuuvoq inoqatiminik akuutitserusuttoq, inoqatiminillu asissortuunngitsoq. Tu-
piginngitsoornerlu ajorparput pisimasunik eqqaamallaqqissusersua, tassami ukiorpassuit matumani pisimasut oqaluttuarisarpai soorlulusooq ippassaammat pisimasut. Taamaammat aamma Indaleeraq nalunngilarput sineriassuatsinni kammalaaterpassuaqartoq, inuugamimi atuagaq ammasoq.
Hendrik Nielsenip eqqaaneqarnera ataqqinartuuli.
Jess G. Berthelsen
SIK-p siulittaasua