SIK-mi peqatigiiffinnut tamanut, sulisut sinniisaannut il.il. nassiunneqaqqammerpoq SIK-mut ilaasortanngornermi immersugassaq iluarsaateqqitaq, ullormit tiguneqarfianit atulersussaq. Immersugassaq kalaallisut, qallunaatut tuluttullu pineqarsinnaavoq.
Immersugassap nutarteqqinneqarnera pissuteqarpoq SIK-p Royal Greenlandimik imaattumik isumaqatigiissuteqarneranik: Royal Greenlandimi sulisut tamanna namminneq kissaatigigaangassuk ilaasortaanermut akiliutissaat akissarsiaannit ilanngaatigineqartassasut – taamalu bankikkoortumik (BS) akiliisarnissaat pisariaqassanani.
Taamaattumik akileeriaaseq taanna ilaasortanngornermi immersugassami nutaami qinigassatut ilanngunneqarpoq – taamaallaalli suliffeqarfinni SIK-p tamatuminnga isumaqatigiissuteqarfigisimasaani sulisunut atuuttussaalluni.
Akileeriaaseq taanna SIK-p erseqqissumik kaammattuutigerusuppaa, ajornanngikkaangat. Tamanummi pisariinneruvoq oqinnerullunilu. Kattuffiullumi nunatsinni suliffeqarfiit allat saaffigissamaarpai tamatuminnga isumaqatigiissuteqarfigerusullugit.
Ilaasortanngornermuinnaq, paasissutissanik allanngortitsinermuunngitsoq
Immersugassaq nutaaq ilaasortanngornermi atorneqartussiaavoq, ilaasortaq pillugu paasissutissanik allanngortitsinermuunngitsoq – soorlu nuukkaanni imaluunniit suliffittaaraanni. Ilaasortaq pillugu paasissutissat allannguutaat taamaattut qanoq ilisukkulluunniit e-mailikkut allakkerivikkulluunniit imaluunniit telefonikkut ilisimatitsissutigineqaannarsinnaapput kattuffiup allattoqarfianut – immersugassamik atuinani. Tamanna aamma immersugassap ilitsersuutitaani erseqqissarneqarpoq.
Ilaasortanngornermi immersugassaq nutaaq ilitsersuutitalik uani aajuk:
► Kalaallisut
► Dansk
► English
