Ilaasortanut aammalu peqatigiiffinni/kattuffimmi suleqataasunut pisariillisaajumalluta ilaasortanngornermi immersuisarnermut ilaasortallu pillugit paasissutissanik nutarterisarnermut tunngasut iluarsiissuteqarfigeqqippavut. Tassani pineqarput ilaasortanngornermi immersugassaq ilitsersuullu tassunga atasoq.
Immersugassaq ilitsersuutitalik nutaaq tallimanngornermi 29. juuli e-mailikkut peqatigiiffinnut nassiunneqartoq tiguneqarneranit atorneqalersussaavoq.
Taakku imaattunik allannguuteqarfiupput:
- Ilaasortanngornermi immersugassaq aammattaaq ilaasortaanermi paasissutissanik allannguinermi atorneqartassaaq (nuunnermi, ilaasortat ilaannut allaasumik akiliuteqartussanut ilanngunnermi il.il.) Taamaattoqartillugu immersugassap qulaani qulequttap ataani krydsiligassaqarpoq.
- Taamaalilluni immersugassaq alla ”Ilaasortaanermi paasissutissanik allannguineq”-mik qulequtalik atorfeerutissaaq. Imaappoq taanna atorunnaarpoq.
- Peqatigiiffinni 20-ni ilaasortat akiliutaasa allattorsimaffiat immersugassap ilitsersuutitaanit (qupp. 2-mit) peerneqarpoq. Tamatumunnga taarsiullugu SIK-p nittartagaani quppernermi ”Peqatigiiffiit”-ni paasissutissat innersuussutigineqarput, tassani allanneqarsimammata peqatigiiffinni ataasiakkaani ilaasortat akiliutaat sukkulluunniit atuuttut.
Aamma soraarnerussutisiallit 1/4-mik akiliuteqarsinnaasut immersugassami krydsiliiffissaqalerput, tamannalu aamma ilitsersuummi taaneqarpoq.
2022-mi ukiap ingerlanerani qarasaasiatigut ”Ilaasortalerissut” nutaaq atulersussaavarput, taannalu periarfissanik nutaanik ammaassisussaammat – soorlu nittartakkakkut toqqaannartumik immersuilluni ilaasortanngortoqarsinnaalissammat – tamakkuninnga ineriartortitsinissat iluarsiissuteqarnissallu pillugit suli oqaasissaqassaqaagut. Nalunarumaanngilaq, tutsaqarumaarpugut.