Ataatsimoorutta nukittunerussaagut! Taamaattumik SIK-mut ilaasortaanissaq pitsaassaqaaq taamalu sulisartut atugarisaannik pitsanngorsaaniarnermi kattuffiup suliniarnera tapersersorlugu.
Taamaammat Maniitsumi sulisartut peqatigiiffiata siulittaasua Elisabeth L. Hansen sisamanngornermi 31. marsi 2022 Brugsenimiippoq kuglepennit, mobilit toqqavii ussassaarutaasinnaasullu allat atorlugit SIK anguniagaalu pillugit paasisitsiniaalluni. Aamma nerriviup qaaniikkujoq atuagaq ”JessGustav”, sulisartut peqatigiiffeqarnerata kattuffeqarneratalu oqaluttuarisaanerata ilaanik paasisaqarusuttut atuarsinnaasaat.
Elisabeth unnersiorpoq iliuuseqarneq iluatsilluarsimanerarlugu. ”Assut alutorineqarpoq, ilaasortanngortullu 12-iupput,” taama oqaluttuarpoq, qaammammilu uani apriilimi taamatut ilaasortassarsioqqissamaarlutik oqaatigalugu.
Maniitsumi allanilu paasisitsiniaanerit ilaasortassarsiornerillu – soorlu Nuuk Centerimi sapaatillu-akunnerani uani Paamiuni – upernaaq manna KNR-TV-mi ussassaarutitigut tapersersorneqassapput. Tassa ataasinngornermi apriilip sisamaani aallartittumik sapaatip-akunnerini sisamani tulliuttuni soorlu Qanoruup siuninnguatigut takutinneqartunik SIK-mut tunngasunik ussassaaruteqartassaaq, sapaatip-akunneranut qulequtaq ataaseq sammineqartassalluni.
.
Maniitsumi sulisartut peqatigiiffianni siulittaasoq Elisabeth L. Hansen Brugsenimi iluatsilluartumik paasisitsiniaallunilu ilaasortassarsiorpoq.