Sulisartut SIK-ip isumaqatigiissutai malillugit akissarsiallit ukiut tamaasa SIK-ip sulinngiffeqarnermut aningaasaateqarfianut qinnuteqarsinnaapput, makitaagunillu sulinngiffeqarlutik angalanissaminnut akiliunneqartarlutik.
Ukioq manna ilaqutariit katillugit 431 makitaasimapput, taamalu inuit 1300 missaanniittut 2016-imi feeriarlutik aallarsinnaanngorlutik. Makitaasimasunit qulit maanna utaqqisuniipput.
SIK-ip sulinngiffeqarnermut aningaasaateqarfia sulinermik inuussutissarsiuteqartut SIK-ip isumaqatigiissutai malillugit aningaasarsiaqartut sulinngiffeqarlutik angalanissaannut bilitsissaannik akiliussinnaanissaannik siunertaqarpoq. Aningaasaateqarfimmit akiliunneqarsinnaassaguit SIK-ip isumaqatigiissutai malillugit atorfeqassaatit, sulisitsisut aningaasaateqarfimmut akileeqataasartunut ilaassaaq aammalu qinnuteqassaatit eqqortumik immersukkamik, taannalu SIK-ip immikkoortortaqarfianut, SIP-mut, tunniullugu imaluunniit e-mailimut feriefonden@sik.gl-imut nassiullugu, ulloq qinnuteqarfissaq kingulleq nallertinnagu.
Makitsinermi peqataatinneqarsinnaanngilatit ukiut kingulliit sisamat ingerlaneranni makitaareersimaguit, tassa inuit sapinngisamik amerlasuut aningaasaateqarfik nuannaarutissarsiffiginiassammassuk.
SIK-ip sulinngiffeqarnermut aningaasaateqarfia pillugu uani aamma atuagassaqarpoq: www.sik.gl
Ukioq 2018-mut makitsinissamut SIK-p Sulinngiffeqarnermut Aningaasaateqarfianut qinnuteqarfissaq tulleq pissaaq 1. maajimiit 1. aggusti 2017-mut.
