(SIK-p Inuusuttaanit oqaaseqaat:) Siunissaq eqqarsaatigalugu, massakkullu pisut eqqarsaatigalugit ernumanartoqarpoq. Ilinniartut aningaasarsiaat aammalu atugaat suusupagineqarpallaarujussuarput.
Ilinniartitaanermut naalakkersuisup nuannaarutigalugu nalunaarutaa tupigusuutigaara. Tassami kialluunniit qaammammut qaffaatit 134 kr. aammalu angajoqqaaminni najugaqartunut 63 kr. nuannaarutigissallugit atorfissaqartinngilai.
Qiviariartigit Peqqissaanermik Ilinniarfimmi atuartut. Taakkua atuagarsinissaminnut 2.900 kr.-nik ikinnerunngitsunik amigartoorput, qaffaatillu tamanna iluaqusernavianngilaa.
Siunissamut ilinnialerusuttunik ujarlissagutta malunnaatilimmik qaffaateqartariaqarput! Aamma inuusuttut sulinatik uninngaannartut nanineqarsinnaanngitsut naninavianngilagut atugarisinnaasaat pitsanngorsaaviginngikkutsigit. Kanngusaarneqaannarsinnaanngillat ilinniartut, uatsitulli atugaqarput, uatsitulli nerisassat akiinik akiliisarput, ineqarnermut akiliisarput. Kanngunarpallaarujussuaqaaq 134 kr. nuannaarutaasutut nalunaarutigineqartoq!
Inussiarnersumik inuulluaqqusillunga
SIK-p Inuusuttaasa siulittaasuat
Peter B. Mølgaard
+299 22 21 38
