Skip to content

Ilinniartut ineqarnikkut atugarisaat ajorluinnarput

Ilinniartut ineqarfii pillugit sukumiisumik misissuisoqartariaqarpoq siunissaq ungasinnerusoq eqqarsaatigalugu ilinniartitaaneq pitsaasumik ingerlanneqassappat. SIK-p Inuusuttaanit oqaaseqaat.

Ullumikkut ilinniartitaaneq eqqarsaatigissagaanni atugassarititaasut assigiinngeqaat, ilinniartut ineqarfii sinerissamiittut ilai ullutsinnut naleqqukkunnaarsimapput, allaallu ajorluinnartutut taaneqarsinnaasut najugarineqarput, allaallumi peqqissutsimut akornutaasinnaallutik.

Isumaqarpungalu ilinniartut ineqarfii pillugit sukumiisumik misissuisoqartariaqartoq, siunissaq ungasinnerusoq eqqarsaatigalugu ilinniartitaaneq pitsaasumik ingerlanneqassappat tamakku aamma peqqutaaqataalluinnarmata.

SIK-p Inuusuttaani siulersuisunut ilaasut marluk August qaammat SPS Ilulissanut pulaarput, tassanilu ilinniartut atugarisatik pillugit annertuumik ikioqquneqarlutik. Ineqarfiimmi ilaat toqqissisimananngilluinnarput, tassami siniffiit ima nutaanngitsingaat ilaasa sissingusaat nuisasut, ilaat atorneqaqqissinnaanngitsut, allaallumi ilai sofani sinittariaqartarsimallutik. Ilinniartut angerlarsimaffeqartussaapput toqqissisimaffigisinnaasaminnik, angerlartartussaanngillammi kialaarfiusinnaanngitsumut.

Ilinniartut ineqarfiini atortut tamarmik ajoqutillit taarserneqartariaqarput, tassami kinaluunniit angerlarsinnaasariaqarpoq toqqissisimaffigisinnaasaminnut! Ilinniartut meerartallit eqqarsaatigissagaanni pissutsit piviusut toqqissisimanaratillu peqqinnanngilluinnarput!
 

SIK-p Inuusuttai
Siulittaasoq: Jens Ole Næsgaard Madsen          
Attavissat:
Email: inuusuttut@sik.gl            
Mobil +299 23 81 63