Oqaaseqaat: Maanna ilinniartunit misigineqartartut sakkukilliartunngivipput, sulisartorpassuilli aamma tamanna misigisarpaat.
Assersuutigiinnartigu kujataani pisoq, ilinniartup isertitaaniit qaffasinnerusumik ineqarnermut akiliuteqartariaqartarnerit. Tamanna pissusissamisuunngilluinnarpoq! Ilinniartitaanermut naalakkersuisumut anngunneqarnikuupput ataatsimeeqatigineratigut, kisiannili suna kinguneraa? Soorunami kinguneqanngilaq. Ilinniaqqusilluta oqalukkaluarutta siunissaq aaqqissuunneqaqqinngippat ilinnialerniarlutik qinnuteqartartut ikiliartuinnalissapput!
Akissarsiaat qiviariartigit, ukiorpassuit attorneqarnikuunngisaannarput. Kisiannili ukiuni taakkunani nioqqutissat, ineqarnermut akiliutit allarpassuillu qaffakkaluttuinnarsimapput. Taava aperisariaqalerpugut, siunissaq ornitarput qaamasuussappat naak ilinniarsimasut siunissami naatsorsuutigisinnaasagut?
Inuusuttut sulisartut aamma taamatorluinnaq atugaqarput, timemut aki qaffakkumaneqartarpoq annerpaamik 2kr, naak sorpassuit akitsoraluttuinnaraluartut. Kommune Qeqertalik qiviariartigu, kommunep inaataani ineqarsimagunik qaammammullu 4700 kr.-inik akiliisarlutik, taava 470 kr.-inik qaffanneqassaaq. Naak akissaat? Naak inuuniutissaat?
Minnerpaamik inuusuttut sulisartut ilinniartullu qiviarneqartariaqalerput, siunissaq qaamasoq pilersissagutsigu.
Inussiarnersumik inuulluaqqusillunga
SIK-p Inuusuttaani siulittaasoq
Peter B. Mølgaard
+299 22 21 38