Pele Kristiansen Ôdâq Olsenip aningaasaateqarfianit kajumissaaserneqarpoq, uani tunniussisuulluni Ilulissani sulinermik inuussutissarsiutillit peqatigiiffiata siulittaasua Else Jonna Lange.
Ulloq pingaartorsiorfiusoq, nunani tamalaani sulisartut ulluat 1. maaji, Ilulissani inoqarluarpoq. Katerisimaarneq katersortarfimmi ingerlanneqartoq oqalugiarnertigut, nipilersuutinik akunniliillattaarnikkut kajumissaasiinertigullu nuannersumik pisimasoq Ilulissani sulinermik inuussutissarsiutillit peqatigiiffiata nalunaarutigaa.
Oqalugiartuupput peqatigiiffiup siulittaasua Else Jonna Lange, sulisut sinniisaat sinnerlugit Ane Louise Olsvig, kommunimi inuussutissarsiornermut ataatsimiisitaliami siulittaasoq Anthon Frederiksen aamma Partii Naleqqap Ilulissani siulittaasua Knud Fleischer.
Sulisartut peqatigiiffianni ilaasortaalluartutut kajumissaaserlugit tallimat peqatigiiffimmit tunissuteqarfigineqarput taamatullu aamma Ôdaq Olsenip Aningaasaateqarfianit kajumissaasiisoqarluni.
Katersortarfimmi katerisimaarnermi makitassanik tunissuteqartuupput suliffeqarfiit Royal Greenland, Halibut Greenland aamma Pisiffik.
► Else Jonna Langep oqalugiaataa aajuk una toorlugu
► Ane Louise Olsvigip oqalugiaataa aajuk una toorlugu