Ulluni makkunani Inatsisartut ataatsimiinneranni aningaasaqarnermut naalakkersuisup akileraartarnermi inummut ilanngaatip qaffanneqarnissaata aappaagumut piviusunngortinneqarsinnaaneranik apeqqusiinera SIK-p immikkoortortaqarfiini siuttut ulluni makkunani Nuummi katerisimaartut maluginiarpaat.
Immikkoortortaqarfinni siuttut tupigusuutigilluinnarpaat maannakkut aalisartut aalisakkanut akitsuutitigut appaavigineqarsinnaanerat annertunerusumik akerlilerneqarnani akuerineqartutut isikkoqarmat.
Aalisartut isertitaat ukiut kingulliit ingerlaneranni annertoorujussuarmik qaffassimapput. Soorunami qutsappavut. Kisianni aamma sulisartut atugarisaasa annertuumik pitsanngorsaaffigineqarnissaannut piffissanngorpoq. Tamatumunngalu atatillugu eqqaamaneqarluarpoq inummut ilanngaatit qaffanneqarnissaat qanittukkut Inatsisartunut qinersineq sioqqullugu qineqqusaarnermi sulissutigisassatut qineqqusaarutigineqartut ilagimmassuk.
Sulisartut qatsulluinnarpaat suusupagineqartutut inissinneqartuarnertik. Tassami periarfissat marluinnaapput: Sulisartut akissarsiaat toqqaannartumik annertuumik qaffanneqassapput, taamaaliortoqarumanngippalli aalisakkanut akitsuusiisarneq suli annertusineqartariaqarpoq, taamaalilluni sulisartut akileraartarnermi inummut ilanngaataasa suli annertunerusumik qaffaaffigineqarnissaat anguneqarsinnaaniassammat.
Eqqaamaneqartariaqarpoq imartatta pisuussutai inuiaqatigiit tamarmik pigimmatigit – sapinngisamillu inuiaqatigiinnut tamanut iluaqutaasariaqarmata.
Jess G. Berthelsen
Kattuffiup siulittaasua