Ittoqqortoormiini, Narsarsuarmi aamma Saqqami SIK-p immikkoortortaqarfii klubbinngorput.
SIK-p kattuffittut aaqqissuussaaneranik aalajangersakkat malittarisassaniittut naapertorlugit immikkoortortaqarfiussagaanni tassani ilaasortat ikinnerpaamik 35-ussapput. Ukiullu marluk kingulliit ilaasortat 35-nit ikinnerujuaannarsimappata kattuffiup siulersuisuunerisa immikkoortortaqarfik nalunaarfigisinnaavaat maanna klubbinngortoq.
Immikkoortortaqarfiit taaneqartut pingasut taama nalunaarfigineqaqqammerput. Tassalu immikkoortortaqarfiujunnaarlutik klubbinngorput, immikkoortortaqarfimmit qaninnermit imaluunniit kattuffiup allattoqarfianit nakkutigineqartut.
Tassa imaappoq Narsarsuarmi SIK-mut ilaasortaasut Qaqortumi immikkoortortaqarfimmut atalerput Saqqamilu ilaasortaasut Ilulissani immikkoortortaqarfimmut atalerlutik. Ittoqqortoormiinili ilaasortaasut SIK-p allattoqarfianut Nuummiittumut atalerput.
Tassa ilaasortat ataasiakkaat sulisartut kattuffiannut SIK-mut ilaasortaassusiat allannguuteqanngilaq – taamaallaat kattuffiup iluani immikkoortumut sorlermut ataneq allannguuteqarpoq.
Klubbi siulersuisoqarsinnaavoq. Siulersuisoqanngippat immikkoortortaqarfik attavigineqalersoq inummik attaveqaataasussamik toqqaassaaq.
Immikkoortaqarfiit ilaata ilaasortai 35-nit ikinnerulersimappata immikkoortortaqarfik ilisimatinneqartussaavoq ilaasortaqassuseq aappaagu ukiumi naatsorsuuteqarfiusumi tulliuttumi taamaaginnarpat immikkoortortaqarfik klubbinngorsinnaasoq. Alluitsup Paani immikkoortortaqarfik maanna 2020-mi marsip aallartinnerani taama nalunaarfigineqarpoq.
Kattuffiup aaqqissuussaanera
SIK-p kattuffittut aaqqissuussaanerani ullumikkut ”qaleriiaat” ukuupput: Ataatsimeersuarneq (ukiut sisamakkaarlugit), Nakkutilliisoqarfik (ataatsimeersuarnerit akornanni ukiut tamaasa), Siulersuisuunerit (ataatsimeersuarnermi qinikkat), Immikkoortortaqarfiit aamma Klubbit.