NSIP aamma USIP ”Immikkoortortaqarfitsialattut” toqqarneqarput

Upernavimmi Nuummilu sulisartut peqatigiiffii SIK-mut immikkoortortaasut ukioq manna 2021-mi”Immikkoortortaqarfitsialannik” imminnut taasinnaapput. Tamanna SIK-p siulersuisuunerisa aalajangerpaat, aalajangiinerlu nalunaarutigineqarpoq qaammatip matuma aallartinnerani kattuffiup Ilulissani ataatsimeersuarnerani.

Siunnersuutigineqartut arlallit akornanni taakku toqqarneqarsimapput.

Taava sooq USIP aamma NSIP ”Immikkoortortaqarfitsialammik” taasariaqarpat? Tunngavilersuutit siulersuisuunerit nalilersuinerminni najoqqutarisaat arlaliupput:

Ilaasortaqarluarpoq, ukiup qaangiuttup ingerlanerani amerlasuunik ilaasortassarsisimalluni. Ilaasortanik sullissilluarpoq, sammisassaqartitsilluartarlunilu. Suliffeqarfinnut attaveqarluarniarpoq. Kattuffimmik suleqateqarluarpoq. Minnerunngitsumillu: Sulisut sinniisoqarnerannik aallussilluarpoq.

Nuummi Upernavimmilu kammalaativut taama taaneqartussatut toqqagaaneranni pilluaqquavut!

2021-mi ”Immikkoortortaqarfitsialaat” SIK-p Ilulissani ataatsimeersuarnerani nalunaarutigineqarput.