Ineqarnermut akiliutinik qaffaanissamik pilersaarutit naalakkersuisunit saqqummiunneqartut SIK-mit peqatigiiffinnillu tassunga atasunit arlalinnit akerlilerneqarput.
SIK-p siuliuttaasuata Jess G. Berthelsenip oqaaseqaataa:
A/S INI-p aammalu Illuut A/S-ip akinik qaffaaniarnera unitsilli.
Maani nunami pissusissamisuunngitsoqarpoq. Naalakkersuisoqatigiit qineqqusaarutigaat ilaasortagut atugarissaarnerulissasut, ilaatigullu tamanna qinigaassutigaat.
Qanittukkut nalunaarfigineqarpugut A/S INI-mi aammalu Illuut A/S-imi najugaqartut akiliutaat qaffaaffigineqassasut, taamatullu qaffaaneq isumaqarpoq ilaasortatta ulluinnarni atugaat kiarmiaasit ajorseriassasut.
Taanaannaanngilaq! Tassanili eqqorneqartussat tassaapput meeqqat, angajoqqaammi aningaasanik annikinnernik tigummiaqalerunik meeqqaminnut tunniussinnaasaat soorunami innarlerneqassapput.
Oqartoqarsinnaavoq ilaasortagut aallerfigisinnarlugit qaleralinniat 17 millioner koruunit nalinganut appaaffiginiarneqarput – oqartoqarsinnaagunanngilarlu taakku atugaat ajorluinnartut.
Pissusissamisoorsinnaanngilaq peqareersut tunillugit illuatungaatigulli ilaasortagut qaammammut inuuniapiloortartut arsaartorlugit, eqqaamaneqassaarmi ilaasortatsinnut100 kroninnguarluunniit naleqaertorujussuummat, taamaattumik SIKmiik ilungersorluta inissianut qaffaatissat unitseqquagut.
Aamma eqqaamasariaqarparput taakku inissiarsuit Naalagaaffimmiik ukiut 50-it matumali siorna tigunikuugatsigit enørinnguarmilluunniit akiliinata.
Pisortat inissianik attartortittagaanni ineqartunut akinik qaffaaniarneq unitsilli
Pissusissamisuunngilaq pisortat inissiaataanni akiliutip najugaqartuinnarnut tutsinneqarniarnera.
Kattuffipput SIK taperserlugu nalunaassaagut akuersaarsinnaanngilluinnarlugu ineqar-tunut qaffaaniarnerit kisimik ineqartuniit akilerneqartussanngornerat.
Ilaqutariilluta inissaqartuaannarnissarput aammalu angerlarsimaffimmik qasuersaarfissamik aqagumullu qasuersimalluta nukissanik aallerfissatsinnik tunisisartumik pisariaqartitsiuaannarpugut.
Inuiaqatigiinnut akisussaqaataanerput saqqummiukkusoqaarput, akissarsiatsinniik akile-raarutinut nakkartittakkatta tamatsinnut iluaqutissanngortittarneri aamma tassani ilaalluni pisortat inissiaataannik attattortitsineq.
Naalakkersuisoqatigiit qineqqusaarutigaat sulisartoqatigiilluta pitsaasumik atugarissaar-nerulernissarput, ilaatigullu tamanna aamma inissaqartitaanitsinnut attuumassuteqarluinnarpoq.
Akuersaarpagut inissiat ullutsinnut naleqquttut pigineqarnissaat, iluarsaassinerillu inuiaqatigiinnit tamatsinniit akilerneqartariaqartoq isumaqarluta.
Qeqertarsuarmi SIP-p siulittaasuata Anda Kristiansenip oqaaseqaataa:
SIK malillugu akissaatilinnut qaffaanissaq akuersaaruminaappoq
SIP Qeqertarsuaq-miit Kattuffiup SIK-p Siulittaasuata Naalakkersuisut ineqarnermut akiliutip qaffannissaanut tunngasumik nalunaarutaanut tapersiuteqarluta matumuuna nalunaarpugut.
SIP Qeqertarsuaq-miit isumaqarpugut inissiat 1960-70-kkunni sanaat qangarsuarlili nutarsimasinnaasimasariaqaraluartut taamaattorli sananeqaramilli suli iluarsaqqinneqaratillu ullumikkumut nutaatut akilersorneqartut.
Qujanassagaluarporli nutaavinnik SIK malillugu akissarsialinnut nammanneqarsinnaasunik inissianik inuusuttunullu tulluuttunik sanaartortoqarsinaassagaluarpat, – nalunngilarpummi ullumikkut sanaartorneq eqqarsaatigalugu akisuneqqusaanneq ersarippallaatsiartoq, – qallunaat nunaanni isikkivik apeqqutaatillugu akigitittagaatut akilersuillutik..
Naatsumik oqaatigalugu SIK malillugu akissaatilinnut qaffaanissaq akuersaaruminaappoq.