2021-mut aningaasanut inatsisissamik isumaqatigiissutip imarisaanut tunngatillugu SIK-mit maluginiakkavut ukuupput:
Suliffeqarfissuup uagut inuiaqatigiittut pigisatta Royal Greenlandip 33 procentia tikillugu privatinut tuniniarneqarsinnaanera misissorneqarniarpoq. Tamatuminnga siunniussineq SIK-p uggornartuutippaa annertuumillu isorisariaqartillugu. Tassami inuiaqatigiit Royal Greenlandip iluanaarutaanik pissarsisarput. Taavalu iluanaarutai kikkunnut tunniuttalissavavut?
Kilisaataatilissuit namminersortut politikerinit assuarineqaqqajaasarput. Taamatut ajorinnittutut inisseriarluni illua’tungaatigut inuiaqatigiittut pigisatsinnik namminersortunut, immaqa taakkununngarpiaq, tuniniaarusutsattoqarnera imminut assortorneruvoq. Eqqarsaatit imminnut ataqatigiinngillat.
SIK isumaqarpoq Royal Greenland inuiaqatigiit pigisarput erligisariaqaripput – taannami maannakkut kisiartaangajalluni sinerissami illoqarfinnik nunaqarfinnillu atatitsisuuvoq.
Eqqarsaatigineqarpoq Royal Greenlandip ilaa taamatut tunisinnaasuugaanni taava nunap immikkoortuini mittarfiliortiterneq aqqusinniornerlu akissaqarfigineqalissagaluartut.
Mittarfissualiortitsilertinnani eqqarsaatigineqarsimassagaluarpoq aningaasat atugassat suminngaanniit aaneqassanersut. Tassami takorlooruminaappoq qanoq ililluta inuiaqatigiit taamak ikitsigaluta mittarfissuit taakku marluk akilissanerivut. Maannakkummi timmisartorsuaq Kangerlussuarmut mittarpoq ullormut 230-nik ilaasoqarluni. Illua’tungaatigut Kastrupimut ullormut ilaasut 83.000-it aqqusaartarput.
Taava: Allaffissornikkut 26 mio. kr.-inik sipaarniartoqarnialerpoq. Tassani qanoq eqqarsartoqarnersoq assut paaserusunnarpoq. Soorlu sulisut SIK-mut ilaasortaasut allaffeqarfinni sulisut qassit soraarsinneqarnissaat naatsorsuutigineqarpa?
Jess G. Berthelsen
SIK-p siulittaasua