SIK-p isumaginninnermut aningaasaateqarfiisa periarfissiissutaasa ilaat aalajangersimasut sapaatip-akunnerani uani KNR-imi TV-kkut radiukkullu ussassaarutit atorlugit ilisimatitsissutigineqaqattaassapput. Tamatumani pineqarpoq isaruartaarnissamut imaluunniit isaruartaaqqinnissamut tapiiffigineqarsinnaaneq.
Ussassaarummi siullermi oqaatigineqarpoq meeqqap sisamanik ukioqarluni peqqissutsimigut misissorneqarneranut ilagitillugu isiginiarnera aamma misissorneqarsinnaasartoq. Taavalu SIK-p isumaginninnermut aningaasaateqarfia isaruartaarnissamut tapiissuteqaqqullugu qinnuteqarfigineqarsinnaavoq – ukiullu marlukkaarlugit isaruartaaqqinnissamik tassunga qinnuteqartoqarsinnaalluni meeqqap 12-inik ukioqalernissaa tikillugu.
Tassunga tunngatillugu ussassaarummi taaneqarpoq meeqqat atuarfimmi pitsaasunik atugaqartinneqarnissaat SIK-p pingaartitarigaa.
Ussassaarutip aappaani ilisimatitsissutigineqarpoq isaruartaarnermi SIK-p aningaasaateqarfia 2.975 kr. tikillugit tapiissuteqarsinnaasoq, isarussap pisiarinerani akianut nikingassutaa nammineq akiligassaalluni.
Erseqqissarneqarpoq SIK-p isumaginninnermut aningaasaateqarfia tapiissuteqarsinnaassappat qinnuteqartup sulisitsisua aningaasaateqarfimmut pineqartunut akiliisartuusariaqartoq.
► Una tooruk isumaginninnermut aningaasaateqarfiit pillugit paasissutissanik atuarumallutit.
Juaannannguaq Lennert TV-mi ussassaarutit assiliartaannik titartaasuuvoq. Taassuma aamma SIK-mit paasissutissat ussassaarutillu allat assiliartalersugarai, soorlu naqitaaqqat ”SIK-mut ilaasortaanerup iluaqutissartai” aamma ”Peruluutaasumik napparsimalernermi ingiaqatigineqarneq” (kattuffiup isumaginninnermut aningaasaateqarfiisa tapiiffigisartagaanik paasissutissiissutaasoq).