SIK-p siulittaasuanit oqaaseqaat: Naluara Atassutip Siulittaasuata Aqqaluk Jerimiassenip SIK uparuassallugu sooq taama nuannaritigineraa, tassami ataasiaannarlugu tusalinngilara SIK nukilaannerarlugu uparuaraa.
KNR-ikkut oqalliffimmi 4. oktobari 2024 partiit siuttuisa sulisussaaleqineq pillugu oqallinneranni aamma SIK uparuaqqippaa.
Allaat peqqusiileqivunga Aqqaluk Jerimiassen oqaluttuutissallugu naasuiaatissallugulu Landskarsip matuersaataa SIK-p tigumminngimmagu, tigumminnittullu Landskarsip matuersaataanik ilaatigut tassaammata Inatsisartunut ilaasortat.
Aqqaluk Jerimiassenip ilisimanerpaa isumaqatigiinniarnermi qanoq SIK piumasaqartarnersoq – SIK kisiat pinnagu, aammattaaq kattuffiit allat pivai (AK-mi aamma uparuarmagu). Piumasaqaraangattali akineqartuarpugut Landskarsi akissaqanngitsoq. Tassa taannaavoq akissutigineqartuartoq.
Maannakkut isumaqatigiinniarluta aallartingajalerpugut, matumuunalu Atassutip siulittaasua ilisimatereersinnaavarput 15 procentimik piumasaqaratta. Tamanna matumuunakkut Aqqaluk Jerimiassenimut tusarliutereerparput tassa. Taamaattumik naatsorsuutigaarput maannangaaq Atassutip siuttaasuata isumageriissagaa isumaqatigiinniaqqilerutta 15 procentimik qaffassasugut, tassami illit Inatsisartuni ilaasortatut oqartussaaffik mikinngitsoq tigummivat, Inatsisartummi Landskarsip matuersaataa tigummivaat, SIK-junngitsup imaluunniit kattuffiit allaanngitsut.
Allaavorlu una: Qangali SIK-p suaartaatigimmagu Landskarsi aningaasanik amerlanerusunik isertitaqartariaqartoq tamatta atugarissaarnerulerniassagatta, tassami maannakkut kommunini aammalu Namminersorlutik Oqartussani akissarsiat ukiumut 3 milliarder kronit qaqimmatigit. Naluara Aqqaluk Jerimiassenip tamanna ilisimaneraa.
Kisiannili tupigusuutigilluinnaqqissaarparput SIK pisuutinniartuarmagu ullumikkut aningaasarsiat taamatut inissisimanerannut, uffa nammineq Landskarsip matuersaataa tigummillugu.
Jess G. Berthelsen
Kattuffiup siulittaasua