Novembari naalersoq SIK Royal Greenlandimi sulisunut ilaasortaanermut akiliutiminnik akissarsianit ilanngaatsittarnissamik aaqqissuussinermut ilanngussimasunut ima sms-erpoq:
“Haluu, qinnuigissavatsigit ilaasortanngorniarluni immersugassaaq aallaqqaataaniit immersoqqinnissaa. Royal Greenlandip ajoraluartumik akissarsianiit ilanngaatsittarnissamut isumaqatigiissuterput taamaatiinnaramiuk. Betalingsservicekkut ilanngaatsittarnissaq aallartinniassaaq.”
Tamanna ima oqaluttuassartaqarpoq: Royal Greenland aamma SIK aasap ilaani isumaqatigiissuteqarput Royal Greenlandimi sulisut SIK-mut ilaasortaanermut akiliutertik akissarsiamit ilanngaatitut akiliutigisinnaassagaat tamanna kissaatigineqarpat, bankimi Betalingsservice aqqutigalugu akiliutigisarneranut taarsiullugu.
“SIK-p tungaanit isumaqatigiissut tamanna assut iluarisimaarneqarpoq,” SIK-p allattoqarfiani pisortaq Bjarne Petersen oqaluttuarpoq. “Aaqqissuussinerlumi aallartilluaqaaq Royal Greenlandimi sulisut 100-t sinneqartut piffissap sivikitsuinnaap ingerlanerani nalunaarmata ilaasortaanermut akiliutigisartagartik akissarsiamikkut ilanngaatitut pisalissasoq. Sulisullu allarpaaluit nalunaarput siunissami taamatut akiliuteqartalernissaq soqutigalugu.”
Taamaammat tupigisuutigineqaqaaq SIK septembari naajartulersoq Royal Greenlandimit e-mailimik ilisimatinneqarmat isumaqatigiissut atorunnaarsinneqartoq.
Royal Greenlandip isumaqatigiissummik atorunnaarsitsinini imaattumik pissuteqartippaa:
“Aaqqissuussinerup tamatuma atuutsinneqalernissaanut tunngatillugu ilaatigut unamminartoqarsimavoq, tassani uagut RG-mi aamma SIK-p sulisut neqeroorfigisimagatsigit SIK-mut ilaasortaanermut akiliutertik akissarsianit ilanngaatigalugu akilertarsinnaagaat”.
“Erseqqinnerusumik nassuiarneqanngilaq unamminartuutinneqartut suunersut,” Bjarne Petersen oqarpoq, naggasiillunilu: “Tupinnarporli isumaqatigiissuteqannginnermi Royal Greenland pissutsit tamakkua misissoqqaarsimanngimmagit, soorlu aamma SIK-p apeqquseraa ”unamminartut” tamakku ima annertutiginersut allaat akissarsiatigut ilanngaassinikkut tamanna atuutsinneqarsinnaanani.”
Kisianni SIK-p allattoqarfiata misilissavaa sulisitsisut allat aaqqissuussinermik tamatuminnga isumaqatigiissuteqarfiginiarlugit. Tamanna iluatsissanersoq piffissap takutikkumaarpaa.